Nelson Mandela serro por syempre sus ojos

Klara PERAHYA Judeo-Espanyol
11 Aralık 2013 Çarşamba

Nelson Mandela serro por syempre sus ojos a un mundo ke el amava i ke se esforso de salvar de la indjustisya, inegualidad i servitud. Fizikamente el no es mas de muestro universo, moralmente el lo sera syempre.

El fue uno de estos ombres ke kon sus ideas i sus aktos trokaron no solo la facha de sus payis i la manera de pensar de sus puevlo, ma ke tambyen tuvyeron un impakto konsideravle sovre la konsyensya mundyal en su totalidad.

Al prinsipyo de su karrera politika, en su manseves, myembro del ‘ANCAfrican National Congress’, el avia dirijido un grupo importante de protestatarios prontos a verter sus sangre afin de no murir esklavos, el fue un ombre de kombate envezes sanglante i en mizmo tyempo  un ombre de paz i de djustisya.

Si… el ensenyo a los ke eran viktimas de una kruel opresyon, a no kedar enkavenados a sus mizerya, a no sometersen al Apartheid, a revoltarsen a ke presyo ke fuera, afin de obtener sus derechos sivikos. El partisipo konkretamente i fizikamente a los solevantamyentos i muy provablemente a aktos sanginaryos por los kualos el fue enkarselado durante 27 anyos. İ mas tadre kuando los primeros  rezultados pozitivos de su lucha empesaron a espuntar i ke el fue liberado, el demando a este mizmo puevlo ke el pusho a revoltarse “de lavorar la mano en la mano kon los vyejos opresores, sin odyo ni kualkyer sentimyento de vengansa” en el eskopo de ayegar a una paz  real.

Nelson Mandela fue grande no solo por su lucha kontra el Apartheid ke le kosto individualmente 27 anyos de privasyon de libertad, no solo por aver asegurado legalmente i ofisyalmente la igualidad de derechos a kada myembro de  su puevlo viktima de la indjustisya de un punyado de invahisores ke avian konkuistado sus tyerras por las armas.El fue grande espesyalmente por aver renforsado en la ethika humana mundyal “el konsepto del absoluto derecho de kada mujer i ombre, a la  oto defensa i al respekto”.

Aktualmente kaji el mundo entero lo yora, los grandes de varyos payizes   asistyeron a sus funerales ,entre loskualos el aktual prezidente de los Estados Unidos “Barak Obama’’ ansi ke sus predesesores Bush, Klinton i otros,komo tambyen el prezidente de la Republika Franseza François Hollande i Nicolas Sarkozy ets… ets...

La Prensa mundyal kaji en totalidad le rindyo homenaje.Vos do debasho estas linyas la traduksyon en djudeo espanyol de lo ke eskrivyo a este sujeto la gazeta ‘Le Courrier İnternational’:

“En 1990 Nelson Mandela era konsiderado komo un peligrozo terroristo sovre la shena İnternasyonal, i oy el mundo entero rende homenaje a su lucha. Es verdad ke el perdono a sus presedentes kastigadores, el avyo la puerta a esta parte del mundo ke se avia olvidado de su puevlo. No es su buendad natural ke parvino a azer de la Afrika del Sud una grande Potensya emerjante i demokratika, es su esprito politiko. ‘Mandela no es ni un andjelo ni un santo’ dezir esto sera simplifikar su kombate, el era mortal komo todo modo de kriansa ma el fue un grande Ombre.(fin de sitasyon)

Aktualmente, la situasyon es malorozamente leshos de ser enteramente perfekta en la Afrika del Sud, un grupo relativamente chiko de sitizanos por la mas parte blankos  dominan syempre el sektor ekonomiko...  kaji la mitad de los otoktones son en estado de dezempyego (shomaje).

 Es malorozamente kaji syempre ansi, ninguna situasyon puede trokar totalmente de un momento al otro... Muevos ombres fuertes deven salir de la masa popular para aparejar una mueva jenerasyon de mansevos edukados, konsyentes de sus derechos komo tambyen de sus doveres afin de estableser un ekilibro estable en el espasyo de la vida sivil i ekonomika.