Tal ke desde anyos i anyos lo oyimos i meldamos, una mizma kestyon revyene kon grande frekuensa al esprito de munchas personas, no solo djudias, tambyen de relijyon diferente… eya es la sigyente: “kual es el sekreto de la perenidad del djudaismo kon kaji el mizmo respekto por los prinsipyos morales de baza, la mizma etika i igualmente el mizmo proyekto a realizar?
Kuando munchas otras grandes sivilizasyones ansyanas, azyatikas o Evropeas, tal la de la Gresya, Persa, Ayifto, Roma ets... trokaron de konseptos, mizmo si kedaron kada una sovre sus tyerras... komo eksplikar el destino de un chiko puevlo sin tyerra, dispersado a las kuatro puntas del mundo en grupos la mas parte minimos, puevlo ke pudo sovrebivir kon el mizmo kodigo espiritual i el mizmo respekto por 10 komandamyentos sublimes en sus simplisidad i sus humanizmo, i esto aun los progromes de los kualos el fue la perpetual viktima i las dos grandes desgrasyas de su historya “la İnkizisyon” i mas tadre muncho mas severa “la Shoha” destinada a erradikar enteramente el puevlo djudyo?
Fue syempre ansi del djudaismo; arrondjado de lugar en lugar, menospresyado o insultado, el kontinuo i kontinuara syempre a egzistir, malgrado “el frekuente aleshamyento aktual de los jovenes de la kaza paternal, lo ke rende muy difisil la transmisyon de syertas valores” i “el shifro perpetualmente kreshente de kazamyentos mikstes”. El kontinuara a mentener su prezensya byen flagrante, por seguro grasyas a la kreasyon del Estado de Izrael, i tambyen al universalizmo de su potensyal intelektual komo tambyen moral.
En desparte de esta eternal kestyon ke okupa munchos espritos, espunto aktualmente una segunda ke entriga ainda mas la kuryozidad de varyas personas syentifikas o de editoryalistos aktuales de grandes gazetas, los kualos bushkan ke eksplikasyon dar al fenomeno de la atribusyon del premyo Nobel a “un shifro de savyos djudyos” ke parese ser enorme relativamente a la dimensyon del puevlo.
Por seguro ke no se trata de un akto de favoritizmo de parte del komité ke desida de los ke seran los futuros loreatos... Tambyen no se puede pensar a una superyoridad jenetika...Ay un largo tyempo ke esta teoria ya dezaparesyo del kampo syentifiko grasyas a estudyos muy seryozos ke provan unanimamente la absoluta absensya de kualkyer diferensya de baza entre los varyos orijenes humanos.
Un gazetero eskrivyo ke la razon de la multitud de ‘premyos Nobel djudyos’ puedra ser el rezultado de los esforsos kontinuales ke los djudyos tuvyeron a azer durante sus peregrinasyones, afin de adaptarsen i partikolarmente de azersen akseptar de parte de los payizes ke les dyeron avrigo. Hipotezis ke parese ser muy plozivle.
Es inkontestavle ke “dos mil anyos de vida errante a traves payizes ajenos, kon en el korason syempre el mizmo espanto i el mizmo dezeo de afirmarsen sin nunka renunsyar realmente al patrimonyo espiritual ke les konfiaron sus antepasados” desveloparon en el puevlo djudyo un potensyal de enerjia ke kedo syempre bivo i aktivo.