Sentenaryo del nasimyento de Albert Camus

“Una vida humana valait mas ke una idea abstrakta.” Albert Camus

Klara PERAHYA Judeo-Espanyol
13 Kasım 2013 Çarşamba

Si Albert Camus bivia ainda, el iva fyestar djuevez de la semana pasada su sentenaryo de nasimyento, ma el muryo prematuramente a la edad de 57 anyos en un absurdo aksidente de automobil, relativamente poko tyempo despues de aver obtenido el premyo Nobel.

Varyos intelektuales de Fransya i de Aljeria komo tambyen de otros payizes oksidentales (entre los kualos la Turkia i los Estados Unidos) komemoraron kon fervor su rekuerdo, konvensidos ke este grande eskritor kedara por un largo tyempo un djenero de punto luminozo ke aklarara sus kamino en la vida.

Albert Camus fue i kontinua a ser un giador no solo intelektual ma tambyen moral i kaji syempre un punto de referensya para munchas personas.

Nasido en una famiya de grande provedad en la Aljeria Franseza de entonses, guerfano de padre, su madre kaji illetrada era una simple mujer ke iva ayudar a los lavoros de kaza de famiyas mas poderozas afin de asegurar la komanya kotidyana de sus ijos…

Una partida de su ninyes se paso en las kayes, djugando football kon los otros ijikos del entorno. La primera eskola ke el konosyo fue una de su baryo, kon los mizmos amigos i kaji la mizma atmosfera, ma un profesor se rendyo kuento de su briyante intelijensya i de la vivasidad de su esprito i peno para dirijirlo en direksyon de estudyos mas seryozos…

Muncho mas tadre, kuando para kumplir kompletamente sus estudyos universitaryos, Albert Camus fue a Paris, el enkontro un grupo de filozofos dirijido por Jean Paul Sartre, ande fue akseptado kon kondesendensya, nunka konsiderado komo un verdadero myembro.

A semejansa de kaji todos los otros partisipantes del grupo, el tambyen era un fervente komunisto i adherava enteramente al ideal sovietiko de la epoka, pronto a luchar por la absoluta igualidad ekonomika entre las personas; ma kuando a la okazyon de un viaje en la Rusia de entonses se rendyo kuento de la diktatura impuesta sovre los individuos i kuando se ambezo la egzistensya de sentros de egzilyo en Siberia para los refraktaryos, Camus immedyatamente se retrakto, lo ke provoko el odyo de sus kompanyeros, eyos siegamente fideles a teorias a primera vista grandiozas ma inhumanas.

Komo la totalidad de su ovra mo lo afirma i ke varyos komentadores lo konfirman, Albert Camus no fue en ninguna okazyon un filozofo en la sinyifikasyon komun del termo, el no fue nunka sentensyozo, ni promulgo teorias konsideradas irrefutavles. El era un pensador atado partikularmente a la bushkidad de una sinyifikasyon a dar a la egzistensya humana en su frajilidad. El era (en el senso el mas kompleto del byervo ) un humanisto i tambyen una Konsyensya

Tal ke lo dize uno de los analistes de su ovra, “Albert Camus konvensido de la absurdidad de la kondisyon humana, propoza “la revolta komo repuesta” La revolta konduze el ombre a la aksyon i ansi da un senso al mundo i a la egzistensya humana, lo ke endjendra una estranya alegria, lakuala ayuda a bivir i a murir.” 

Si mi memorya no me enganya, me akodro vagamente ke un otro komentador avia klasifikado kuatro de los relativamente nombrozos livros de Camus de una tala manera a eksplikar esta mizma idea:

“L’etranger” (la absurdidad de la kondisyon humana). Un dia de enverano, el anunsyo de la muerte de su madre echo a un ombre, absensya de lagrimas de su parte i mas tadre pleto por un motivo futil kon un individuo deskonosido ke lo pusha asta el krimen, lo ke okazyona su kondenasyon a la pena de muerte.

“Le mythe de Sisyphe” (syempre el mizmo tema de la absurdidad de la kondisyon humana, ma esta vez akseptada).

‘Sisyphe’ personaje mitolojiko kondenado a azer rodar kontinualmente, asta la sima de una montanya, una enorme pyedra ke una vez a destinasyon fatalmente rekaye de la otra parte del monte… akto por seguro absurdo, repetido al infinito sin esperansa de pueder eskapar, ma ke demanda una aksyon konsentida de su parte.

“L’homme révolté” ‘La revolta es un derecho, eya es un movimyento i se plasa en la aksyon’ (mos dize Camus)…la revolta endjendra valores i arranka el ombre de su soledad.’

“La peste” (Segun mi, uno de sus livros los mas sinyifikantes) Se trata de una sivdad debasho la amenaza de la pesta, dunke de una grande probabilidad de muerte inminente, enteramente kortada de kualkyer kontakto kon el eksteryor…ma aun el peligro de kontajyon i la grande improbabilidad de salvasyon para los atakados, el Dr Drieux va de kaza en kaza i kontinua su lavoro …Al empesijo el es solo a azerlo, ma poko mas tadre unos kuantos de sus amigos se adjuntan a el.

“La Peste” es el livro ke afirma la importansa de la lucha kon o sin esperansa de ayegar a kualkyer rezultado, akto gratuito ke aze djustamente ‘la razon de ser i la dinyidad de la persona’.

İ para konkluir una otra refleksyon de Albert Camus: “La vida valait la pena de ser bivida, porke el ombre puede sovrepasar la absurdidad de su destino, grasyas a su lusidez i su revolta”.