El primer rabino en el parlamento de Arjantina

Dora NİYEGO Judeo-Espanyol
6 Kasım 2013 Çarşamba

El rabino Sergio Bergman va ser el primer rabino ke va entrar al parlamento de Argentina en el mez Desembre. Bergman va ser el primer ombre de ley judyo ke va lavorar por una nasion, afuera de İsrael.

El partido de Begman gano el 34.5 de los votos, en las eleksiones del parlamento.

‘Fuimos elijidos para protejar la ley i la konstitusion, i para mejorar el pais komo lo izimos mas antes en la sivdad Buenos Aires’ esta diziendo Bergman.

Anyos antes, Bergman aviya deshado su kariera de biokemika i farmakolojiya para pueder lavorar en el rabinato. Su mujer lo aviya forsado ke entre al rabinato porke ya saviya ke su marido se iva sintir mas kontente de lavorar komo rabino.

Oy, Bergman tiene sukuenta i un anyo, tiene kuatro ijos, i es el eskridor de sinko livros. Serjio Bergman fondo un network de eskolas judiyas, i projektos edukativos. En el mez de Mayo, resivyo el Premio Mikah en la Union Mondial del Judaizmo Progresisto en Yerushalaim, por su fonksion en la justisya sosyal.

Bergman es tambien rekonosido en la komunidad judiya komo un pensador lider, en las temas de espiritualidad.

En el anyo 2008, en el prolog de su livro, ‘Citizen Argentina’, Papa Francis aviya eskrito ke Bergman empleya la Bibla komo enspirasion, para pueder konstruir una baz en los komportos de los kompatriotos.

Bergman empeso su kariera politika kuando empeso a lavorar komo ombre de ley en la munisipalita de Buenos Aires.

En su kariera politika, Sergio Bergman nunka guadro su identidad judiya, i siempre estuvo kon la kipa en la kavesa. En una reunion de la kampanya de su partido, el dio un deskorso yeno de aluziones biblikas, diziendo ke sus kompatriotos tienen menester de ser unidos para pueder konstruir la tierra santa en la sivdad de Buenos Aires, i pueder developar la tierra prometida de Arjantina. 

‘Arjantina esta en una kriza de valores. Kreygo ke la Tora va pueder ayudarmos mezmo en la politika’ esta diziendo Bergman. ‘Yo so kontra la union del estado i la relijion, ma la Tora se puede empleyar para enjektar valores profondas mezmo en la politika’.

Bergman esta diziendo ke los non-judyos lo keren mas muncho de los judyos. El esta pensando ke si el puevlo mos konose mas muncho, el nivo del antisemitizmo va ser mas enferior. ‘Lo ke puedo garantizar es ke, puedo ser kritikado por munchas kozas, ma no por ser un rabino. El puevlo me puedo kritikar ke esto lavorando por un partido de la derecha, o pueden kritikar mis fonksiones por la ley, ma dingunos no me pueden kritikar porke so judyo. Arjantina resivio la demokrasiya en el anyo 1983, i agora los judyos estan muncho mas libros en todo modo de lugares’.

Algunas personas pueden pensar ke, por modo ke Bergman va ser una figura politika, va aver mas muncho antisemitizmo en el pais, ma otras personas vana dizir ke Bergman va ser un sembolo de la entegrasion de los judyos en la sosiedad nasional.

Komo los otros kompatriotos del pais, Bergman tiene el derecho de partisipar aktivamente a la politika, i lavorar por el partido ke kere.

Bergman bive en el foburgo Belgrano de la klasa media, ande esta situado el seminario, i la majorita de las kongregasiones konservativas de la sivdad.

Bergman, un tiempo, fue membro de dos organizasiones rabinikas – Asamblea Rabinika del Muvimiento Konservativo, i la Reforma Asosiasion Santral de Rabinos Amerikanos. Ma, en el anyo 2012, renonsio de la Asamblea Rabinika, diziendo ke fue muy difisil de forsar los rabinos de los dos muvimientos, de lavorar endjuntos.

La  kontinuasion de la fonksion de Bergman en la politika depende del prezidente de su partido, Marki, ke anonso ke va ser kandidato por ser prezidente en el anyo 2015.