En estos dias, syempre la mizma kestyon

Klara PERAHYA Judeo-Espanyol
18 Eylül 2013 Çarşamba

Es ke realmente la diplomasia puedra salir viktoryoza en el Oriente Medyo, kon la sola intervensyon (sostenida por la ONU) de dos, tres o sinko payizes ajenos i el solo akordo de destruir las inyovles armas toksikas en posesyon de la Siriya?.. Ken lo puede afirmar?

Todo komo fue unos kuantos siglos antes para la Evropa, el Oriente Medyo es en este momento komo una masa humana heterojena, en mizmo tyempo unifikada en syertos kavzos por una mizma relijyon, ma kaji syempre kompuesta de varyas etnias ke tyenen kada una su propya lektura i interpretasyon del Koran, lo ke sovre multiples sujetos konstitue un “todo kaotiko” del kual las differentes parselas no paresen syempre korresponder las unas a las otras.

Dos diplomatos ajenos: “El ministro Ruso apresurado de prokurar una puerta de salida mas o menos akseptavle al kapo de un payis amigo” I : “su homologo Amerikano partikularmente konsernado, el, por syertas valores etikas ke kontentaran su konsyensya i la de su puevlo”, todos los dos dezeozos de kalmar i no enflamar ainda mas la situasyon aktual, estan penando a topar una solusyon mas o menos adekuada al kavzo.

La grande difikultad del problema es, sovre todo, el fakto ke el mundo se topa simultaneamente delantre un diktador kruel kulpavle de matar inosentes sin defensya - facha a facha kon una opozisyon kompuesta en mizmo tyempo de verdaderos revoltados luchando por la djustisya, ma mesklados a una grande kuantidad de djihadistos ke malorozamente no konosen syempre la valor real de la vida.

 A este propozito, la prensa mos ambeza ke desde vyernes pasado el 13 del mez koryente, kontraryamente a los uzos i kostumbres de la ONU, antes mizmo de resivir ofisyalmente el raporto relativo al drama Siryano, el prezidente Ban Ki-Moon (a la sigida puede ser del bomvardamyento de un hospital) ya akuzo Bashar Al Asad de aver perpetrado un “krimen de gerra”.

Konsernando la utilizasyon de gazes toksikos, al empesijo, sin atribuir direktamente la responsavilidad del fakto a ‘Bashar el Asad’, Ban- KiMoon afirmo ke el raporto de los ekspertos de la ONU va konkluir de una manera akablante sovre la utilizasyon de semejantes produktos i ke los responsavles tendran a dar kuento de sus aktos ke konstituen un verdadero krimen kontra la humanidad.. .

En realidad, segun lo ke meldimos en varyos diaryos, los ekspertos de la ONU ke izyeron la enkuesta no eran mandatados a dezinyar los responsavles de la utilizasyon de semblables armas, ma simplemente de afirmar si: “Si” o “No” eyas fueron utilizadas i en kavzo afirmativo, bushkar en ke sirkunstanyas.

Ansi, es a partir de indisyos materyales: eshantiyones biolojikos, fragmentos de projektiles i igualmente fragmentos de la tyerra ande fueron topados, komo tambyen de testimonyos de medikos i de viktimas eyas mizmas, ke Ban KiMoon avlo.

Entre myentres, poko mas leshos de la otra parte de la frontyera Siryana, sovre el Golan, desde unos kuantos mezes, fue instalado un chiko hospital de urjensya ande medikos İsraelyanos se esforsan de kurar en una atmosfera de absoluta diskresyon, kualkyer ferido de gerra siryano ke bate a sus puerta i en kavzo de gravidad lo mandan a los sentros hospitalyaros los mas grandes del payis.

Ke syempre un solo dezeo suva del fundo del korason i de la konsyensya de la kriansa humana: Ayudo resiproko, kerensya, i akseptasyon los unos de los otros.

 

P.S. Al pareser, (segun lo ke eskrive ‘le point’) , el raporto de la ONU sovre el masakro en Siriya  del 21/8 es tanto grave,  ke pusho el Ministro Ruso a opozarse a un teksto de la  Organizasyon Mundyal ke amenaza el Rejimen Siryano de graves sanksyones.