En el pasado (un pasado byen leshano, es verdad) uvo un tyempo ande avriamos kon prisa la televizyon, yenos de esperansa de ver una emisyon interesante ke puedra konfortar muestro esprito.
Oy es kon espanto ke lo azemos, kaji syempre kon ezitasyon i sin ninguna voluntad espontanea, en el solo eskopo de saver lo ke se pasa en muestro entorno. I a kada odisyon, es el mizmo tablo: ravya, matansinas i muerte... muerte de mansevos la mas parte del tyempo, de revoltados muchas vezes inosentes ke reklaman sus derechos o defenden kon insistensya sus ideal sin por esto obtener kualkyer rezultado.
Es en varyas partes del mundo ke esto se produze, en la Amerika del Sud komo tambyen en la Afrika i varyos payizes Azyatikos… En Nijerya, ay unos kuantos dias, 42 muertos a la sigida del atako de una eskola, de parte de un grupo enemigo… En Ayifto desde el presipyo de los eventos kaji 130 personas pedrieron la vida; shifros ke mos esmoven profundamente kuando los meldamos ma ke poko mas tadre se unden en el olvido.
Eyos son komo aparisyones sin karas ni puerpos de las kualas munchas vezes los nombres no son mizmo pronunsyados ni eskritos sovre kualkyer pyedra o pedasiko de papel.
Ma detras de eyos, detras de estos shifros ay vidas brutalmente interrumpidas, proyektos elaborados kon ardor ke nunka se kumpliran, iluzyones o dezeos ke no se realizaran… Detras de estos shifros ay sovre todo madres i padres ke yoraran toda la vida, o byen guerfanos ke no konoseran nunka la dulsor de la sonriza de una madre ni el konsejo de un padre…
La Syria se topa desde kaji dos anyos facha a facha kon una semejante situasyon, la kuala de dia en dia devyene mas trajika… İ agora ke sera del Ayifto? En este momento despues la destitusyon del presedente Prezidente Mohamed Morsi, la ezitasyon es grande… La formasyon de un muevo governo es primordyal i por esto empeso a formarse un komite provizaryo de ombres sezudos ke, despues largas diskusyones, desidaran de la data i de las kondisyones de muevas eleksyones.
El prezidente interimaryo aktual “Adli Mansur” penso un momento al mundyalmente byen konosido Mohammed El Baradei para el posto de primer ministro provizoryo... la koza fue anunsyada Shabat pasado el 6 del mez koryente ma kaji immedyatamente despues fue rektifikada por razon de refuzo de parte de una de las kompozantes de la ‘Opozisyon aktual’, grupo salafisto i relijyozo ke se deklara amigo de los liberales i laikos, el kual preteksto ke Mohammed El Baradei es mas un ‘Ombre İnternasyonal de salon’ ke un Shefe serkano de su puevlo.
Segun lo ke meldi a este sujeto en un artikolo sinyado por Denise Ammun, korespondyente en Ayifto de la revista ‘Le Point’: “Mohammed El Baradei (selebre figura juridika al nivel internasyonal, Shefe durante un largo tyempo de la “AİEA” i loreato del Premyo Nobel en 2005) fue por ansi dezir la persona ke introduzyo la revolusyon en Ayifto.
En efekto, desde Desembre 2009, epoka ande una partida del payis estava undida en la mizerya i ke Hosni Mubarak aparejava su propyo ijo a suksedarlo, el selebre avokato reklamo la demokrasia i yamo a un trokamyento de la konstitusyon i a eleksyones enteramentes libres.
Los partizanos de Mubarak refuzaron por seguro kategorikamente i lo trataron de ‘estranjero al payis’, por kontra la idea de un trokamyento entro en el esprito de nombrozas personas, lo ke aparejo la revolusyon del anyo 2011 a la sigida de la kuala Hosni Mubarak fue destituido.
İnkorruptivle i profundamente nasyonalisto malgrado su absensya del payis durante 30 anyos, Mohammed El Baradei demando entonses ke la mueva konstitusyon sea eskrita antes de azer eleksyones lejislativas, ma no pudo obtener un rezultado pozitivo a esta demanda, lo ke provablemente fue la razon por lakuala el refuzo de ser kandidato a la prezidensya en 2012. Por kontra el fundo su propyo partido nombrado Al-Destour (la konstitusyon).”
Eske esta vez el va achetar a partisipar a las futuras eleksyones? Munchos lo dezean. Ombre djusto, profundamente laiko i demokratiko, el save respektar las opinyones i las kreensas de los otros.
Governar de una manera provechoza es djustamente esto: akseptar el dialogo, eksplikar i mirar de konvenser, i sovre todo saver oir, afin de ayegar a un solusyon ke puedra servir de punto de akordo. En munchas teorias ke envezes mos paresen mankas de valor puede aver una parte de verdad.
En el pasado (un pasado byen leshano, es verdad) uvo un tyempo ande avriamos kon prisa la televizyon, yenos de esperansa de ver una emisyon interesante ke puedra konfortar muestro esprito.
Oy es kon espanto ke lo azemos, kaji syempre kon ezitasyon i sin ninguna voluntad espontanea, en el solo eskopo de saver lo ke se pasa en muestro entorno. I a kada odisyon, es el mizmo tablo: ravya, matansinas i muerte... muerte de mansevos la mas parte del tyempo, de revoltados muchas vezes inosentes ke reklaman sus derechos o defenden kon insistensya sus ideal sin por esto obtener kualkyer rezultado.
Es en varyas partes del mundo ke esto se produze, en la Amerika del Sud komo tambyen en la Afrika i varyos payizes Azyatikos… En Nijerya, ay unos kuantos dias, 42 muertos a la sigida del atako de una eskola, de parte de un grupo enemigo… En Ayifto desde el presipyo de los eventos kaji 130 personas pedrieron la vida; shifros ke mos esmoven profundamente kuando los meldamos ma ke poko mas tadre se unden en el olvido.
Eyos son komo aparisyones sin karas ni puerpos de las kualas munchas vezes los nombres no son mizmo pronunsyados ni eskritos sovre kualkyer pyedra o pedasiko de papel.
Ma detras de eyos, detras de estos shifros ay vidas brutalmente interrumpidas, proyektos elaborados kon ardor ke nunka se kumpliran, iluzyones o dezeos ke no se realizaran… Detras de estos shifros ay sovre todo madres i padres ke yoraran toda la vida, o byen guerfanos ke no konoseran nunka la dulsor de la sonriza de una madre ni el konsejo de un padre…
La Syria se topa desde kaji dos anyos facha a facha kon una semejante situasyon, la kuala de dia en dia devyene mas trajika… İ agora ke sera del Ayifto? En este momento despues la destitusyon del presedente Prezidente Mohamed Morsi, la ezitasyon es grande… La formasyon de un muevo governo es primordyal i por esto empeso a formarse un komite provizaryo de ombres sezudos ke, despues largas diskusyones, desidaran de la data i de las kondisyones de muevas eleksyones.
El prezidente interimaryo aktual “Adli Mansur” penso un momento al mundyalmente byen konosido Mohammed El Baradei para el posto de primer ministro provizoryo... la koza fue anunsyada Shabat pasado el 6 del mez koryente ma kaji immedyatamente despues fue rektifikada por razon de refuzo de parte de una de las kompozantes de la ‘Opozisyon aktual’, grupo salafisto i relijyozo ke se deklara amigo de los liberales i laikos, el kual preteksto ke Mohammed El Baradei es mas un ‘Ombre İnternasyonal de salon’ ke un Shefe serkano de su puevlo.
Segun lo ke meldi a este sujeto en un artikolo sinyado por Denise Ammun, korespondyente en Ayifto de la revista ‘Le Point’: “Mohammed El Baradei (selebre figura juridika al nivel internasyonal, Shefe durante un largo tyempo de la “AİEA” i loreato del Premyo Nobel en 2005) fue por ansi dezir la persona ke introduzyo la revolusyon en Ayifto.
En efekto, desde Desembre 2009, epoka ande una partida del payis estava undida en la mizerya i ke Hosni Mubarak aparejava su propyo ijo a suksedarlo, el selebre avokato reklamo la demokrasia i yamo a un trokamyento de la konstitusyon i a eleksyones enteramentes libres.
Los partizanos de Mubarak refuzaron por seguro kategorikamente i lo trataron de ‘estranjero al payis’, por kontra la idea de un trokamyento entro en el esprito de nombrozas personas, lo ke aparejo la revolusyon del anyo 2011 a la sigida de la kuala Hosni Mubarak fue destituido.
İnkorruptivle i profundamente nasyonalisto malgrado su absensya del payis durante 30 anyos, Mohammed El Baradei demando entonses ke la mueva konstitusyon sea eskrita antes de azer eleksyones lejislativas, ma no pudo obtener un rezultado pozitivo a esta demanda, lo ke provablemente fue la razon por lakuala el refuzo de ser kandidato a la prezidensya en 2012. Por kontra el fundo su propyo partido nombrado Al-Destour (la konstitusyon).”
Eske esta vez el va achetar a partisipar a las futuras eleksyones? Munchos lo dezean. Ombre djusto, profundamente laiko i demokratiko, el save respektar las opinyones i las kreensas de los otros.
Governar de una manera provechoza es djustamente esto: akseptar el dialogo, eksplikar i mirar de konvenser, i sovre todo saver oir, afin de ayegar a un solusyon ke puedra servir de punto de akordo. En munchas teorias ke envezes mos paresen mankas de valor puede aver una parte de verdad.
