La restorasion de la sinagoga de edirne Se va eskapar a la Fin del anyo

Dora NİYEGO Judeo-Espanyol
3 Temmuz 2013 Çarşamba

La grande Sinagoga de Edirne era una de las mas grandes Sinagogas de la Evropa. Duspues ke los lavoros de restorasion vana eskapar a la fin del anyo, la Sinagoga va avrir sus puertas al servisio, i a va taner tambien un Muzeo de la Kultura Judiya.

Segun el governador de la sivdad, Hasan Duruer, la komunidad judiya va pueder azer de muevo bodas en la Sinagoga komo era un tiempo. Ken save, puede ser ke los viejos rezidentes de la sivdad vana vinir para kazar sus ijas i sus ijos en la Sinagoga ke eyos se kazaraon.

Antes sien i ocho anyos, en el anyo 1905, uvo un grande fuego en Edirne, i danyo muncho la Sinagoga. Duspues del fuego, ell Sultan Abdül Hamid II izo konstruir el edifisio de agora, en el anyo 1906. En el anyo 1907, komo un sembol de relijion i de tolerensia en Edirne, ke era la kapitala otomana de akeyos diyas, la Sinagoga se avrio al servisio. El projekto de la Sinagoga fue aparejado por el architekto fransez, France Depre, enriva del model de la Sinagoga de Viena En el enterval de sien i siete anyos, una grande parte de la Sinagoga fue destruida, i los lavoros de restorasion empesaron en el anyo 2010, i se vana eskapar a la fin de este anyo. Kreygo ke la Sinagoga se va avirir kon una grande selebrasion, i los viejos rezidentes de Edirne vana vinir de munchas partes del mundo, para asistir a esta selebrasion. Komo no kedo komunidad judiya en Edirne, tambien el sentro kultural, en atirando turistos judios, va kontribuar a la vida sosyal i kultural de la sivdad.

En el empesijo del ventien siglo, la populasion de Edirne era 20 000. Oy solo una famiya judiya bive en la sivdad. La famiya Rıfat i Sara Mitrani ke biven aya, son los ke empesaron el primer servisio de catering en la sivdad.

El arshitekto Rubi Asa, i el prezidente de la Sinagoga disheron ke no va aver dingun trokamiento en la Sinagoga, el edifisio va guadrar su forma orijinal. Ma, malorozamente komo la puerta estuvo rota por anyos, las palatas, los tapetes, los tapones brodados, i otros aksesuares ke fueron rovados en el anyo 1988, no se pueden meter al lugar.

Los viejos rezidentes de la sivdad ke agora biven en paizes etranjeros, kada anyo vienen a Edirne por vijitar la sivdad, el simeterio ande estan enterados sus parientes, i las kazas ande biviyan anyos antes. Les embarasava muncho de ver la destruida Sinagoga ande pasaron los Shabates, i las fiestas de sus chikes, i de sus manseves.

Los rezidentes turkos de Edirne estan seguro ke el turizmo de la sivdad se va arebivir kon la restorasion de la Sinagoga. Ansi, la sivdad va ganar la atansion ke merese. Munchos viejos rezidentes vana vinir, i vana azer sus orasiones en la Sinagoga restorada. Komo munchos de eyos se kazaron aya, no es posivle de olvidarsen este lugar santo.

Edirne es la puerta de la Turkiya ke se avre a la Evropa. Kon estos esforsos, la sivdad se va konvertir a una puerta kultural de la Evropa, i la ‘erensiya de la kultura judiya’ de esta sivdad, se va reanimar en el Muzeo de la Kultura Judiya. Los estudientes de la Universidad de Trakya vana reanimar las bodas de un tiempo, los konseres del Koro Maftirim, i las orasiones de la Sinagoga. Las dammas vana servir boyos, borrekas i limonada a los turistos.

Esperamos ke estos esforsos, i aparejos vana travar munchos turistos, i la sivdad va ganar de muevo la reputasion ke teniya un tiempo.