Un estudio amostro ke: LOS İSRAELIANOS SON LOS MAS OROZOS DEL MUNDO OKSIDENTE

Dora NİYEGO Judeo-Espanyol
19 Haziran 2013 Çarşamba

Tiffanie Wen, un eskridora de los periodikos Times of İsrael, Newsweek, i Cooler, eskrivio un artikolo sovre el rezultado de un estudio. Wen no es judiya ma bivio en İsrael por un sierto tiempo para eskrivir un livro, i tuvo tiempo de analizar la vida de los israelianos.

‘Aunke los israelianos tienen tantos problemes en sus paizes, este estudio esta amostrando ke los israelianos son los mas orozos del mundo oksidente.

Todos ya konosemos los problemes de İsrael, i de los israelianos, el mas emportante problem siendo las gerras, i los konfliktos kontinual. Komo puede ser ke entre tantos problemes, kuando le demandas a un israeliano ‘komo estas?’, la primera koza ke te dize es ‘Baruch Hashem’?

İsrael es el solo pais ke estuvo kontinualmente en un estado de gerra desde el diya ke David Ben Gurion deklaro la independensia del pais en el anyo1948. Las gerras i los konfliktos ne tuvieron eskapasion. Mezmo en los tiempos de pas, no ay repozo en el pais: israelianos firridos en la frontiera del este de Yerushalaim, armas kemikas en las manos de Hizbullah, u roketas viniendo de la parte de Gaza. 

Profesor Zahava Salamon de la Universidad de Tel Aviv, esta diziendo ke este estado kreo una paradoksa psikolojika. Este estado, de una parte los izo ‘konsientes del risko de muerte’, i de otra parte los izo ‘sin espanto’. Si una persona bive kontinualmente kon el risko de murir, la sola koza ke pensa es ‘bivir el diya, tomar plazer del diya ke bive’. En lugar de pasar mas muncho tiempo kon la famiya, el mansevo prefera de pasar el diya kon su amiga: suvir montanyas, azer ‘scuba-diving’, u kon un sako en la espalda ir a la Amerika del Sur por pasar un anyo.

Los israelianos tienen munchas kozas de espantarsen, i por esta razon se ambezaron a no espantarsen de nada. Un estıdio publikado en el ‘Journal of the American Medical Association’ amostro ke los israelianos se rekuperan de un ‘estado post travmatiko’ mas presto ke las otras nasiones oksidentales.

Munchos estudios amostraron ke los israelianos se estan auzando muy presto a los muevos konfliktos. Mezmo ke estan konsientes de las menasas, se sienten mas korajozos porke son ovligados de bivir la vida de kada diya, azer sus echos, i gerreyar kon las menasas.

Los israelianos se gritan de parte a parte ma no puedesh ver dos israelianos peleandosen kon punyos, u amenasandosen de parte a parte. El puevlo se izo pasensiozo. Los mansevos asperan mezes para topar un echo duspues ke salen de la armada. Los ke no tienen otos, se suven al otobus, i duspues kaminan debasho del sol kayente para ir a sus kazas, i no se keshan de este estado. Todo lo ke dizen es ‘Baruch Hashem’.