“No me syento realmente libre si danyo ken ke sea en su libertad, porke entonses el oprimido i el opresor son todos los dos privados de sus humanidad”. Nelson Mandela
Las dos grandes figuras ke, estos ultimos dias, dominan el esprito de muchas personas son la de Nelson Mandela i desde la fin de la semana pasada, la de Hassan Rohani elijido prezidente del Iran.
Un punto komun aserka los dos ombres: el refuzo del ekstremizmo i el amor por “la moderasyon” echa eya de sezo i refleksyon.
El primer: Nelson Mandela aedado de kaji 95 anyos ya konfirmo de una manera irrefutavle (kon sus aktos i proyektos realizados) la valor del ideal de paz i armonia ke syempre dyo alma i vigor a sus esforsos.
Simbolo de un kombate insesante kontra el “apartheid” i figura emblematika de una eternal bushkida de libertad i de dinyidad no solo en favor de los suyos, ma tambyen de los ke poko tyempo antes fueron sus opresores, el es komo una afirmasyon luminoza de lo ke es el ‘humanizmo’ en el espasyo oskuro de muestro tyempo.
Unas de sus prinsipales palavras son: “Ser libre no es solo romper sus propyas kavenas, ser libre es bivir de una manera ke respekta i renforsa la libertad de otros ke si mizmo” i tambyen: “Para azer la paz kon un enemigo se deve penar kon este enemigo i ansi el enemigo devyene un kompanyon de lavoro”.
Referandomos a esta manera de pensar, se puede igualmente insistir ke el humanizmo de Nelson Mandela no fue unikamente echo de aktos de simple jenerozidad en direksyon del otro, ma de bushkida de kolavorasyon kon el. Segun el grande ombre, es solo en el dialogo i en el esforso echo lado kon lado kon el adversaryo, ke se puede ayegar a la mijor solusyon de kualkyer problema.
Esto dicho, ke sera el verdadero programa de governansa de la segunda grande figura aktual, de Hassan Rohani reputado ser mucho mas suple ke su terrivle predesesor? Ke seran sus inisyativas en este espasyo kaotiko ke es aktualamente el oriente Medyo?
Su nominasyon fue un grande momento de kontentes para numerozos payizes evropeos ke immedyatamente despues el anunsyo de su eleksyon, le propozaron de kolavorar kon el.
En el portal de su mandato prezidensyal, sus primeras palavras fueron “saludo la viktorya de la moderasyon sovre el ekstremizmo”. Sl ancheamos el senso del byervo ‘Moderasyon’, se puede deduzir ke el sinyifika ‘no kedar unikamente enfohado en su sola manera de pensar, respektar tambyen la de los otros’.
Es ke, entornado de fanatikos, el puedra kedar fidel a sus primeras impulsyones? Es ke Hassan Rohani puedra deklarar publikamente, a boz alta, ke el rekonose el derecho del Estado Israelyano no solo a la vida ma tambyen al respekto?... Es ke el puedra ser moralmente ekitavle en la bushkida de una solusyon para el problema Israelo-Palestinyano en tomando en konsiderasyon la situasyon jeografrika ande el payis djudyo se topa i las olas de odyo ke lo entornan?
El primer Ministro İsraelyano Benyamin Netanyahu demando dia de Alhad a la komunidad İnternasyonal de mentener syempre la presyon sovre Teheran konsernando sus aktividades Nuklearas. El tenia razon, lunes la prensa franseza eskrivyo ke Hasan Rohani el mizmo deklaro ke la aktividad en kestyon va kontinuar.
Mas prudente ke los payizes evropeos, Washington se kontento de dizir ke los Estados Unidos son prontos a kolavorar kon el muevo governo Iranyano espesyalmente en el objetivo de topar una sulusyon ke puedra kalmar la inkyetud de los otros payizes de la rejyon.
Los dias a venir avlaran i mostraran ande se topa la verdad.