Alhad ultimo selebrimos el dia de las madres kon muestras famiyas; maridos, ijas, ijos, nonas i nonos.
Este dia presyozo, estimado por todo el mundo empeso a selebrarse en 1907, grasyas a una manseva ke se yamava Anna Jarvis, ke aviya peryido a su madre en su chikes.
Kada anyo; el sigundo alhad del mez de mayo, se felisita el dia de las madres. En la Turkiya empeso a fyestarse en el anyo 1955.
MADRE! El byervo, la nosyon primordyal de muestra ekistensya...
Muestra responsabilitad es, ke; para alivyanar, para fasilitar la vida de muestras madres, no es solo kuando tyenen menester de mozotros ke seyamos allado de eyas, ma; syempre las kereremos byen i koryeremos para resolvar sus problemas.
Las madres son el simbolo; de la kerensya sin asperar nada del d’en frente, del devuamyento sin fin; eyas son las egzistensyas sakras, bendichas ke sus lugares no se puede inchir kon kualker koza.
Empesando del dia del nasimyento eyas korren a todo i se okupan de una parte kon la sanedad fizika i psikolojika de las kriaturas, de la otra; azen un esforso spesyal para pueder aparejar sus ijos al futuro; ke seyan utiles i provechosos a la umanidad.
Las madres son la baza de las komunitades en engrandesyendo, en edukando i kultivando los individuos (birey) sanos i kon buenas entuisyones (sağduyu).
Eyas estan toda la vida allado de mozotros; tanto en los momentos los mas orozos de muestra vida ke en los momentos los mas difisiles.
Todas las madres son una roza. Eyas kon sus eksperiensas aklaran, arrelumbran muestros kaminos, eyas mos ambezan a kerer byen; el mundo, las personas i la vida, eyas aseguran muestra mirada al futuro kon esperansa i kon konfiensa.
En la sirkulasyon de la vida; el lavoro, la parnasa, el koryer, el asigo, estan tomando el lugar de muestros serkanos; i ansina la emportansa de estos dias espesyales esta pujando.
Yo penso ke; la kerensya i la fidelidad ke no estamos puedyendo amostrar en esta sirkulasyon de la vida; lo estamos mostrando en estos dias privados.
Dingunos no mos puedemos olvidar de muestras madres.
A este sujeto vos kero kontar una konseja ke aviya meldado en una revista.
- A un tyempo; aviya una kriatura ke se estava aparejando para vinir al mundo.
- Un dia le demando al Dio.
- Dio mio; me disheron ke me van a embiyar al mundo amanyana.
- Ma yo; so tan chiko i sin fuersa; komo va bivir aya?
- El Dio le respondyo.
- Entre todos los Ancelos yo eskoji; uno para ti.
- Eya te va asperar i te va tomar debasho de sus alas i te va protejar.
- Tu Ancelo te va kontar kada dia konsejas i te va sonreir.
- Ansina tu vas a ver ke te esta keryendo byen i vas a ser orozo.
- Bueno; kuando me van a avlar, komo no se sus linguas, komo va entender?
- Tu ancelo te va dizir las mas ermozas i dulses palavras ke puedes sintir en el mundo.
- Te va embezar a avlar, kon muncha atansyon i kerensya.
- Bueno; yo, si kero avlar kon ti kualo va azer?
- Tu ancelo te va embezar a orasyonar en avyendo las manos.
- Me ambezi ke ay munchas personas negras en el mundo. Ken me va protejar de lo negro?
- Tu ancelo te va protejar al koste de su vida.
-Ma yo; esto muy triste porke no te va ver otruna ves.
- Tu ancelo va avlar de mi kontinualmente, i te va embezar komo me vas a ayegar (ulaşmak).
La kriatura le demando la kestyon de alkavo.
- Agora me esto aparejando para iyir al mundo.
- Kualo es el nombre de mi Ancelo?
- Kerido mio; no es emportante el nombre de tu Ancelo.
- Tu la vas a yamar “MADRE”.
Keridos Lektores;
Esto felisitando a todas las madres este dia sakro.
El Dyo ke mos ayege para kada anyo kon muestras madres endjuntos.
