Ahare

Rav Yeuda ADONİ Köşe Yazısı
17 Nisan 2013 Çarşamba

En la peraşa ‘Ahare’ nos enbeza el sirvisyo ke aziye el Koen Gadol en el santuvaryo en el diya de las perdonansas. Yom Kipur Arambam la mişna la eksplika dizyendo: Kuando el Koen Gadol tornava a su kaza despues ke kumplyo su sirvisyo, lo akonpanyavan asta su kaza i aziya un banketo a sus keridos po ke tornava a su kaza sano i rezyo.

El banketo ke aziya el Koen Gadol era pork e no se danyo en el santuvaryo la ora ke el izo su sirvisyo. Un Koen ke no era pertenesyente por azer el sirvisyo de el diya de la perdonansa no puediya salir bivo de el santuvaryo I por esta razon es ke el Koen Gadol no deviya alargar su orasyon, por no azerlos dezesperar a el puevlo.

El banketo ke aziya el Koen Gadol en su kaza, le enteresava a su persona el Koen gadol deviya ser kazado I orasyonar por su famiya I no salo por si. Antes de el diya de las perdonansas se deviya apartarse de kaza I santefikarse. Kuando ya izo su sirvisyo key a fue resivido de parte de el todo poderozo, tornava kon alegriya a su koza, onde su famiya.

El sirvisyo ke aziya el Koen Gadol en diya de Kipur era por santefikar a el mundo el este tomar la santedad de las Alturas I abasharla a el mundo ande bivimos nosotros ansi en tornando. El Koen Gadol a su kaza Trayiya kon si la santedad a su kaza I a el mundo.

Semejante a este sujeto lo rankontramos en Rabi Akiva ke es dicho por el. Entro kon pas I salyo en pas. Rabi Akiva estudyo todos los sekretos de la Tora. Este estudyo no la izo solamente para si solo sino por enbezarlo a el mundo entera.

El eskopo de la kreasyon de el mundo es de azerle una morada a el Kriyador en este mundo por traer la santedad de las arturas a el mundo el este.

En el livro “Tana deve Eliyau” meldamos: Ansi dize el Kriyador a Israel, yo kualo dezeo de vosotros? De amarvos unas kon otros de onorarvos unos kon otros. Komo el Kriyador se apiada kon todas las Kriyansas I nosotros devemos de apiadarmos de unos a los otras, seya moralmente seya materyelmente. Kada persona es presyozo verso el Kriyador, pork e es su Kriyansa, I nosotros devemos apresyar a toda persona porke todas somos Kriyansas de el todo poderozo. Malgrado todos nos defektos el Kriyador syempre esta entre nosotros.

Aşohen İtam betah tumotam.