Alhad pasado el 10 del mez koryente, Shimon Perez (prezente en Fransya para asistir a la triste komemorasyon del terrivle asasinato perpetrado el anyo pasado en una eskola djudia de Toulouse) enkontro en Paris numerozos Shefes relijyozos i siviles Muzulmanos para prezentarles su mensaje de Paz i konfirmar una vez mas ke ‘ningun amalgamo puede ser echo entre Islam i djihadizmo.
El tema prinsipal de sus konversasyon fue (se entyende byen) el integrizmo absoluto i sus terrivles prejuisyos. A un syerto momento, el İmam Hassen Shalghoumi de la Meshkita de Drancy, reputado por su lucha kontra el fundamentalizmo syego i krual, disho: “Muestro kombate de kada dia es dirijido kontra la violensa i el integrizmo. Semos las primeras viktimas de este movimyent... La Vida (es) mas importante ke la Meke”.
Egziste por seguro de las doz partes, voluntades de paz i kolavorasyon ke seran sin dubyo muy provechozas para la totalidad del Oriente Medyo, el kual en este momento parese undirse en un djenero de kaos, ma se trata de meterlas a egzekusyon, de kontinuar la lucha afin de realizarlas.
Las mizmas kestyones son validas por todas las relijyones ande munchas vezes se ve un refuzo de evolusyon simplemente para evitar kualkyer risko de traisyon En el mundo entero, la epoka aktual es rika en eventos entre los kualos syertos de entre eyos se proyektan al eksteryor sin malorozamente ayegar realmente a un kualkyer rezultado por la simple razon de un obskuro espanto de destruir la fragua entera de una kreensa en tokando a la mas chika pyedra.
Lo importante es de kontinuar a luchar. Todo modo de movimyento ekstremisto krea paradoksalmente su kontraryo . En todo modo de epoka uvo ideas obskurantistas, laskualas fatalmente intensifikaron muevos movimyentos progresistos ; uvo implozyones aryento munchos grupos i es ansi ke ayegimos al estado de sivilizasyon aktual.
Ansi en Israel mizmo, un grupo de mujeres djudias( en reaksyon a la dureza de komportamyento del partido ultra nasyonalisto i puede ser ultrarelijyozo) se izo el dever de ir en los territoryos palestinyanos okupados, afin de fasilitar a mujeres palestinyanas de entrar sin difikultad en tyerras djudias en el solo buto de pasar kon eyas unas kuantas oras agradavles de amistad… lo ke provoko se entyende byen vehementes protestasyones.
Es ke ser una persona realmente rellijyoza puede permeter un refuzo del ‘otro’? Komo lo disho Rabbi Heschel: “Un ombre relijyozo es akel ke en su pensamyento, tyene al Dyo i al Benadam en djunto”.
De su parte, el grande pensador Emmanuel Levinas, grande talmudisto i en mizmo tyempo uno de los mas grandes filozofos de muestra epoka al nivel internasyonal, disho: “Todo lo ke no puede ayegar a una relasyon interhumana, reprezenta ‘no una forma superyor, ma una forma por syempre primitiva de la relijyon’. El estatuto mizmo del ‘humano’ implika la ermandad.
