“La Muzika es provablement la lingua verdadera del Subkonsyente, lingua universal ke va mas leshos ke lo ke es posivle de ekspresar kon byervos”. (Louis Geoffroy)
Djueves la noche, aun ke ya savia ke la eskalera asta ayegar al oditoryum del byen konosido Liseo Notre Dame de Sion es muy empinada i difisil a suvir, tuve el dezeo imperyozo de asistir al resital violin-piano del Dr. Musa Albukrek i Nükte Uğurel, los kualos mos izyeron pasar una ora i medya de plazer simultaneamente artistiko i afektivo.
La grande sala estava byen yena; en la asistensya, la mas parte de oditores eran melomanes amorozos de muzika klasika, karas konosidas mizmo amigas i tambyen karas deskonosidas ma avyertas, en todo kavzo la atmosfera en su totalidad paresia ser muy reseptiva.
En el programa kuatro grandes kompozitores. En la primera partida, la Sonata no 4 en ‘re major’ de Haendel ovra klasika muy ostera segun mi i ke demanda una teknika muy rezya; en sigida, la Sonata en Mi minor de Mozart de un klasisizmo muncho mas dulse i mas aksesivle i enfin 3 maraviozas romansas de Schuman de un romantizmo ke mos yevo en un mundo de grasya, subtilidad i armonia , kon despues del entreakto, punto kulminante de la nochada, la sinkena sonata para violin i piano de Beethoven, nombrada “la sonate du printemps”.
Individualmente tengo una preferensya kaji afektiva por Beethoven, sovre todo por sus sinfonias (espesyalmente, la muevena kon en el movimyento final i sus bozes humanas, es verdad muy agudas, kaji estridentes, ma ke paresen yevarmos en un mundo estranyo < lo ke en realidad es la simple konsekuensa de la sodredad del kompositor>)... Amo tambyen sus sonatas tan ekspresivas para piano solo ansi ke las ke fueron eskritas para violin i piano, i entre eyas la sinkena (la sonata de primavera) ke segun mi es komo un dialogo entre el piano i el violon ande munchas kozas son dichas, variavles segun los egzekutantes i tambyen los oditores ... A este propozito, se puede afirmar ke ‘Musa Albukrek’ komo tambyen la pianista ‘Nükte Uğurel’ parvinyeron a interpretarla de una manera partikularmente sensivle ke subjugo el oditoryo.
Largos i ardyentes aplozos saludaron la ovra i su interpretasyon. Fue un ermozo momento de unyon total entre personas ke ‘se konosian i no se konosian entre eyas’ i ke por unos kuantos minutos se enkontraron en la mizma emosyon, djuntos kon los artistos.
No posedo malorozamente una konosensya muzikal sufizyente ni la kapasidad menesteroza para pueder avlar de kualkyer elemento tekniko...ma solamente de la emosyon ke la interpretasyon de esta sinkena sonata produzyo en mi i la ke meldi sovre la kara de los ke se topavan en mi entorno.
Si... komo lo disho Beethoven el mizmo “La Muzika es una revelasyon mas alta ke todo modo de sagasidad”. Puedemos adjustar ke eya en efekto tyene igualmente el poder de krear en el psishizmo de los oditores un sentimyento estranyo echo en mizmo tyempo de dulsor pasifikadora i de intensidad emosyonal.
Konosko Musa Albukrek desde largos anyos, syempre tuve una grande estima por su persona ke save ir muncho mas leshos ke lo ke mos da la vida kotidyana kon sus plazeres futiles i inkonsistyentes. El, desde su chikes, se konsakro a la bushkida de una verdad mas profunda, ahuera de lo ke mos ofrese la epoka aktual.
A este propozito kero atraer la atensyon de los lektores, ke la semana pasada uvo en el espasyo de 4 dias, dos resitales muzikales diferentes: Lunes el 18 del mez koryente, el de Jerfi Aji en Kadiköy, ke obtuvo un muy grande sukseso ma al kual personalmente no pude asistir, visto mi edad bastante avansada, i Djueves 21 Februero el de Musa Albukrek; dos eventos artistikos ke realsaron el prestijyo de muestra Komunidad, komo lo azen abitualmente todas las otras performansas intelektuales, artistikas i teatrales de varyos de sus myembros.
