Desde Shabat la tadre, a la sigida de la muerte de un disidente palestinyano enserrado en una prizyon Israelyana , el aborresimyento de una partida de la manseves de los territoryos okupados por Israel se esta intensifikando progresivamente, de una manera peligroza.
Los palestinyanos pretenden ke la muerte del enkarselado nombrado “Arafat Jaradat” fue kavzada por suplisyos inflijidos de la parte de Israelyanos.
Por kontra, los medikos İsraelyanos pensan ke se trata de una insufizyensya kardyolojika de la kuala la viktima ya sufriia provablemente desde antes de ser inkarselado, lo ke la famiya desmentyo kategorikamente.
El primer Ministro Benyamin Natanyahu demando immedyatamente al Shefe de la Autoridad Palestinyana Mahmud Abbas de kalmar su puevlo, ma el fakto es ke el mizmo esta en estado de ravya.
En todo kavzo el Funeral de “Arafat Jaradat” se paso de una manera relativamente kalma. Ma, ke seran las konsekuensas de esta muerte?