La semana pasada fue yena de eventos, los unos mos azen pensar, los otros mos alegran. Es syempre ansi en muestro mundo instavle, envezes ‘un apreto de korason sin fin ni atemo’ i envezes ‘una esperansa loka’...
Ken ke sean i ande ke se topen, los ombres kedaran eternalmente moradores ezitantes de un espasyo en el universo ke eyos miran de modifikar sin munchas vezes parvenir a entender verdaderamente lo ke azen, konsyentes solamente de ‘sus poder de kriansas pensantes’ i tambyen del ‘drama de sus kondisyon de mortales desmamparados’.
Uno de estos eventos es sin dubyo la demisyon o mas egzaktamente la abdikasyon del Papa Benedictus XVI. Los motivos supuestos fueron multiples i diferentes: al empesijo se penso ke era por kestyon de salud i de aprensyon de no tener la fakultad de pueder asumir de la manera la mas optima su funksyon de shefe de la Kristyandad, lo ke fue konsiderado komo un akto de grandor espiritual.
Ma Martes, un dia despues de su demisyon, mos ambezimos ke su desrepozo no era partikularmente grave i ke se trata de una chika intervensyon para remplasar la pil de su ‘Pacemaker’ i tambyen de una tensyon arteryal mas o menos alta ke deve ser kontrolada kotidyanamente.
Dia de myerkoles en la Bazilika Saint-Pierre, en su ultimo diskorso papal, Benedictus XVI lo konfirmo el mizmo; por kontra, el avlo de la situasyon konfuza por no dezir inkoerente ke egziste en este momento al seno mizmo del Vatikan, invitando ansi todos los ke eran prezentes, a refleshir sovre la importansa de la Fey i de la Vida kristyana . El no se detuvo de anyadir lo sigyente; ‘la facha de la Eglisya es envezes desfigurada, penso partikularmente a las faltas kontra la Unidad i a las divizyones ke egzisten en el ‘Korpus eklezyastiko’.
El Papa Benedictus XVI se distingyo syempre por su konservatizmo absoluto. Una de las karakteristikas las mas markantes de su apostolato fue el respekto kategoriko de la integralidad del ‘kateshizmo’ i el refuzo de trokar la mas chika preskripsyon de tekstos eskritos siglos antes.
En mi bushkida a este sujeto, meldi mizmo ke el enkorajo el “egzorsizmo” afin de aleshar el esprito negativo de Satan. (Le point –dossier-)
De su parte, konsernando la abdikasyon de Benedictus XVI, Mgr Jacques Gaillot, ke es konsiderado komo un kontestador del konservatizmo absoluto, disho:“El Papa me sorprendyo... esta demisyon es una de las kozas pozitivas de su pontifikado, un akto de lusides i de koraje”.
Si, el Papa demisyonaryo fue inkontestavlemente un grande ombre de djustisya i de klemensya... Entre munchas otras kozas, El lucho kon fuersa kontra el negasyonizmo ansi ke kontra la pedofilia, i izo grandes esforsos para restorar las relasyones entre la Eglisya i el İslam.
Oy en dia, la grande kestyon es: “Ken lo va remplasar?” un kardinal rigoristo i konservativo komo El? o byen un kardinal relativamente liberal, konsyente del ovligo de adaptarse mas o menos a la konjonktura prezente, sin por esto tokar a lo ke es esensyal?
Los dias avlaran.
En İsrael: Muestro grande amigo Selim Salti, fundador del İnstituto Ladino en la Universidad de Bar İlan, mos mando dos (2) e-mailes, el uno al sujeto de la grande posivilidad de topar Gaz Natural en la mar entre Israel i el Liban, lo ke sera una grande huente de revenido ekonomiko. Artikolo muy interesante ma muy largo, del kual me topo kon regreto en la imposivilidad de darvos la traduksyon en Judeo Espanyol por falta de lugar en esta pajina ande me es rezervado un espasyo limitado.
En el otro e- mail, Selim mos ambeza kon glorya ke Israel fue klasado segundo (immedyatamente despues del Kanada (primer), i antes del Japon i de los Estados Unidos ke obtuvyeron el treser i kuatren grado, en la klasifikasyon echa a la fin del anyo 2012 por la “ OECD” (Organization for Economic Cooperation and Development) la kuala kalkulo ‘la proporsyon de rezidentes en 34 payizes ke obtuvyeron diplomas de Universidad’ relativamente al shifro de la totalidad de la populasyon.
Esta organizasyon konsidero los 10 primeros, komo Payizes de alta edukasyon.
Toda muestra gratidud a Selim Salti por avermos dado esta buena novedad...
