Vengo de resivir el ultimo livro de Naim Avigdor Güleryüz titulado, “Asırlık Çınar, dünden bu güne Matan Baseter/Barınyurt”
Naim es inkontestavlemente uno de los mijores historyanos ke se interesaron fundamentalmente a la evolusyon de muestra kolektividad ...todo kontribue a esto: su muy grande eksperyensa de la komunidad en el egzersizyo de su funksyonamyento, su esprito personal investigador i analitiko ansi ke su estilo klaro i direkto.
Su prezensya desde mas de 50 anyos en la aktividad de varyos sektores de muestra komunidad, le ambezo a estudyarla en su totalidad. Ansi, el no es solo un simple investigador de los eventos pasados o prezentes, ma un ombre ke (porke bivyo i partisipo personalmente a munchos momentos de la governansa de las prinsipales Institusyones karitativas komo kulturales) tyene un poder de deduksyon muncho mas ancho ke los otros.
En desparte de esto, komo ya lo tengo dicho unos kuantos anyos antes, Naim es un vizyonaryo ke tyene sus pyezes sovre tyerra, a ningun momento el no se pyedre en vanas iluzyones ni proyektos irrealizavles; antes de empesar kualkyer lavoro el guadra sus ojos kondjuntamente fiksos sovre el pasado i el futuro.Ansi, en su mirada sovre kualkyer akontesimyento, el syempre toma en konsiderasyon la konyunktura del momento i las sirkunstansyas en las kualas el evento se produzyo.
En su livro el autor empeso kon las varyas ovras karitativas ke presederon la kreasyon de la Matan Baseter, tal: la Mishne Tora, la Sedaka Umarpe, el Orfelinato, el Moshav Zekinim (İhtiyarlar Yurdu), el hospital Or-Ahayim, el Bikur Holim i munchas otras dedikadas al servisyo de los ke se topan en estado de menester, ovras entre las kualas munchas fueron fundadas desde la epoka Otomana.
Vinyendo a la Matan Baseter eya mizma, eya fue kreada en Edirne i es solo en 1928 ke los ke vinyeron de esta sivdad la fundaron en Estambol para ser mas tadre, en el anyo 1948 aunada al Bikurholim.
Al empesijo (malgrado el lavoro intensivo de sus myembros) las kondisyones de desvelopamyento fueron muy duras por kavza de una grande restriksyon ekonomika. A esta epoka, la mizerya era muy grande i los donadores relativamente raros, ma a ningun momento, kualos fueran los entrompesos i las difikultades, eyos no renunsyaron nunka a luchar.
İ muncho mas tadre, en el anyo 1978, en una seduta del Neve Şalom Vakfi en lakuala se devia desidir del budjeto del anyo sigyente, Naim Güleryüz ke era entonses uno de los myembros los mas performantes de esta İnstitusyon, insistyo kon fuersa por una reorganizasyon de la aktividad de la ovra i avlo de un grupo de damas nombrado “El grupo Ester Tani” ke lavorava libremente kon sus propyos medyos finansyaryos malorozamente muy flakos afin de ayudar en la mezura de sus posibilidades los desventurados ke bivian (malgrado la chika pensyon komunitarya) en un estado de mizerya inimajinavle.
Naim Güleryüz fue uno de los primeros a presentir lo ke puedia dar ‘un entuzyazmo karitativo intenso sostenido por medyos ekonomikos relativamente muncho mas anchos’. Es djustamente de la saga de esta ermoza eksperyensa ke el mos avla en este livro, empesando de los primeros tyempos de su fundasyon asta muestros dias.
Ansi, una vez mas, el autor mos provo la importansa de la maraviyoza karakteristika del puevlo djudyo eternalmente kudyozo de sus ermanos desfortunados, ken ke sean, ande ke se topen, sin baryera ni limite... solidaridad ke ata las unas a las otras personas ke munchas vezes no se konosen.
