La ventana de vuestra ermana: LOS SENTIMYENTOS DE KAZAR UNA IJA

Şeli GAON Judeo-Espanyol
16 Ocak 2013 Çarşamba

Antes un mez i medyo pasi un desrepozo i kalyo iyirme al ospital para una semana. Lores al Dyo ya me metyeron en pyes siguramente kon la ayuda de las kuras. Para estar en pyes kale trokar los penseryos, no kansar i pueder solusyonar las problemas de la vida.

Entonses el dia ke sali i vine a kaza, mi ija me dyo una novela buena en dizyendo ke pensan kazarsen fina sinko semanas.  Naturalmente  ke toda la famiya mos alegrimos  muy muncho.

Mizmo ke en la epoka ke bivimos, los mansevos se estan okupando de organizar toda la boda, kale koryer i penar komo madre i padre i abasteser a lo ke keren. Siguramente sin pueder avlar, en estando mudos i supozando (tahmin etmek) de los djestos lo ke estan pensando.

Malorosamente los mansevos de oy estan lavorando muy duro, sin tener oras fiksas, demanyana muy temprano fina las medyas noches. Por esta kavza estan inyervozos i no estan puedyendo suportar nada.

İ mozotros estamos asperando para ayudarles en maneras diferentes para ke tengan responsabilitades mankas. Eeeee ke se puede azer? Mozotros  les ambezimos a avlar, eyos mos ambezaron a estar kayados! Este modo esta el dor de oy.

Somos auzados de azer todo lo ke  se deve de  azer en su tyempo, no a la ora de alkavo. Eyos komo no tyenen tyempo, todo a la ora orada.

Enfin, kale koryer por los fostanes, por la kaza de los espozados, dirijir, menajar (idare etmek) al marido, al ijo, a la granmama, al granpapa i a toda la famiya.

Veramente a la salida del ospital, no teniya ni fuersa de koryer ni kyef para los aparejos en este tyempo kurto.

Todos tyenen un ancelo (melek) ke ayuda.

Una amiga ke no es amiga ma, mas de ermana me akudyo de alma i korason i todo se realizo fasilmente.

El Dyo ke le de muncho bueno.

Mi nona ke este en ganeden diziya “una boda es una bora, el Dyo ya mete la mano”. İ este modo fue.

El  dia ke mos fuimos las dos madres para ver el fostan de novya  por la primera prova, me emosyoni de ver a mi ija luzya, entera blanka . Di  ke paresiya a un ancelo.

A la fin de la prova, la dirijente del magazen  vino kon tres mansevas i tres mansevos. İzyeron kon el velo un serklo al entorno de mi ija, todos detenyendo de una punta, i mos yamaron a las dos madres para echar bonbones de la kavesa de la novya enriva el velo para ke toda sus vidas seyga dulse i yena de amor.

Estava muy emosyonante i muy ermozo.

Lo mas difisil fue el aparejo de las envitasyones.

En dos dias i noches, las metimos a las anvelopes i las espartimos kon mi kerida amiga i su marido kapache, mi ermano i su mujer ke koryeron a todo,  i mi marido.

Distribuirlas en muy poko tyempo fue muy difisil.

Malorosamente mos olvidimos de unos keridos, tanto estavamos asigidos.

Veramente una bora. Los fostanes kon los chapeyos apropriyados, los kalsados kon las chantas, las kamizas de los ombres kon las kravatas i las kipas todas mizmas, las rozas, la paryentes ke van a  akompanyar la novya, las novyizikas chikas i novyizikos,  las bonbonyeras, okupar de los primos ke vinyeron de Israel, New York i Fransya, envitarlos a kaza noche de shabat, aparejar komidas ke les plaze, koryer a los mandados i munchas otras kozas…..

Enfin el dia de la boda fue un dia ke no saviya komo dirijirme aryento de kaza. Demanyana el berber kon la makyoz i dos lavorantes vinyeron a azer los kaveyos. Kada uno en una kamareta, mas de vente mansevas para vistirla a la novya, todas muy byen vistidas kon chapeyos, la meza en el salon yena de dulsuryas, bevyentas i salados.

Ya salimos de kaza i akompanyimos  la novya kon las arabas una de detras de otra. Arivimos a la sinagoga en su ora. Toda la paryentes, los amigos i konosidos mos arisivyeron kon grande entuzyasmo. Fotos kon toda la famiya i la muzika  divina (ilahi) ampeso .

El dezeo el mas grande de una madre i de un padre es kazar a los ijos en Neve-Shalom en esta sinagoga majestuoza kon las uzansas  djudias.

La seremoniya fue ekstraordinarya kon la avla en turko i en ingles del Rav. İzak Alalu i kon la boz maraviyoza de Natan Siliki i Rıfat Romi.

La direktrisa del sentro kultural Neve-Shalom Tuna Halfon; kon su dulsor i su manera de avlar a los mansevos aranjo todo kon repozo. İzzet Kohen dirijo el protokol i la boda kon su saverisyo i todo el personel de Neve-Shalom koryo de alma i korason.

La entrada de la ija kon el padre mano kon mano fue emosyonante.  El Dyo ke ayege a todos a echar tallet a sus ijas i ijos. Es un sentimyento muy  espesyal ke se bive una u dos vezes en la vida.

Las felisitasyones tomo muncho tyempo a kavza de la djente. A la fin las fotos kon todos endjuntos en la Teva.

Todo se termino  en unas kuantas oras.

Lo emportante es; ke seygan orozos, i ke tengan una vida kon entendimyento entre eyos i muncha felisitad amen.

 

Erratum: En mi artikolo de la semana pasada eskrivi por yerro, ke Selim Salti  era el fundador de una katedra de djudeo-espanyol en la Universidad Bar İlan, kuando en realidad, “el i su mujer Naime” son egzaktamente los fundadores en esta mizma universidad, de un Sentro ke poseda dos katedras i (debasho la direksyon del profesor Shmuel Refael) 8 doktores todos formados por el mizmo departamente ke fue el ke realmente organizo el grande omenaje dedikado a Silvyo Ovadya. Mes ekskuzo serka de Naime i Selim Salti ansi ke serka de mis lektores.