Fueron oskuros los dias de la semana pasada, muy oskuros…
Dias de aborresimyento kontra el Estado Israelyano kon los diskorsos de mas a mas salvajes de “Khalel Mekael” prezidente del Hamas, el kual eskupyo fyel i odyo, no solo en Gaza ma tambyen en varyas otras sivdades palestinyanas… de muevo palavras de negasyon del derecho a la egzistensya de Israel, de muevo el mizmo refuzo de su prezensya en la rejyon.
Dias tambyen de insertidumbre en la governasyon mizma de Israel kon la demisyon de Avigdor Lieberman ke (vyernes pasado) pedrio la immunidad parlamentarya i se topo en el ovligo de travarse de todo modo de aktividad politika afin ke la Djustisya pueda libremente azer su lavoro. El disho: “Desde ayer djuevez, desidi immedyatamente de renunsyar a mis funksyones de ministro de los echos eksteryores i de viche-primer ministro de mi payis’
Komo se asperava, una partida de la prensa internasyonal no manko de formular kritikas severas konsernando la politika Israelyana i mizmo malorozamente la moralidad de algunos de sus dirijentes elijidos libremente por el puevlo, sin por kontra nunka avlar de la alta valor de la djustisya İsraelyana en la imparsyalidad de sus djuzgamyentos.
Dias sovre todo de horror en el Connecticut, a unos kuantos kilometros de New York, ande un desekilibrado mental en estado de delirium infernal, mato su madre kon una de las armas ke eya koleksyonava en el eskopo puede ser de defenderse de atentos enemigos i despues fue en una eskola primarya ande el metyo fin a la vida de munchas personas entre las kualas 20 ninyos de 5 a 10 anyos i 5 adultes, antes de darse el mizmo la muerte de si para si, lo ke izo en todo 27 personas muertas en vano.
Los Estados Unidos en totalidad se topan aktualmente en un estado de terrible abatimyento moral… El karakter ultra-trajiko del kavzo (27 personas ke en el espasyo de unos kuantos minutos, pedrieron la vida) fue un golpe emosyonal ke renforso ainda mas sus dubyo de un peligro de mas a mas iminente.
No es el primer kavzo semejante en este grande payis, diferentes institusyones eskolaryas i mizmo universitaryas konosyeron asaltos similares ke fueron perpetrados kaji syempre por individuos mentalmente dezekilibrados ke tuvyeron libre akseso a armas de fuego.
Munchos prezidentes Amerikanos lucharon sin reushir a prohibir la libre vendida de armas. En su primer mandato Obama tambyen se esforso de realizar un trokamyento, sin pueder ayegar a un kualkyer rezultado konkreto.
‘La libre vendida de armas inisyalmente permetida en el pasado, en el objetivo de dar a kada uno la posivilidad de defenderse kontra kualkyer asalto enemigo’ es una vyeja kostumbre del payis i si no me yerro aze parte desde mas de dos siglos de la konstitusyon de los Estados Unidos.
İze una chika bushkida a este sujeto, i vos transmeto debasho estas linyas el rezumen en djudeo Espanyol (kon las mizmas palavras) de lo ke pude topar:
“Es al nombre de la segunda korreksyon (vyeja de mas de 200 anyos) de la Konstitusyon, lakuala deklara ke ‘una milisya byen administrada es nesesarya para la seguridad del Estado’ ke los Estados Unidos mantyenen el derecho de yevar sovre si armas. Los amerikanos se someten ansi al prinsipyo del derecho natural de otodefensya ke es para eyos el primer de todos los derechos individuales i elkual es garante de todos los otros”.
Ma los tyempos trokaron, las kondisyones de vida i la mentalidad humana tambyen. Lo ke puedia ser nesesaryo ay de esto 200 anyos devino oy muy peligrozo i muy dolorozo.
Komo dicho mas arriva, munchos prezidentes Amerikanos se esforsaron de modifikar este artikolo, sin malorozamente reushir. Es ke esta vez, Barack Obama ke se topa aktualmente en su segundo mandato, no delantre la masa de su elektorato, ma delantre la ‘Historya’, puedra konvenser la mayoria del Kongreso i del Senato de la absoluta nesesidad de esta modifikasyon?
P.S. Martes la noche la gazeta Haaretz eskrivyo: “Justice Ministry delays indictment against Lieberman at last minute“
