Myerkoles pasado, roketas travadas deliberamente sin ningun motivo espesyal de la parte del Hamas, fueron la kavza de la muerte de 3 moradores İsraelyanos, en el Sud del payis.
Komo se entyende byen, la repueste de Israel fue fuerte, muy fuerte. El shefe del grupo militaryo del Hamas Ahmet Jabari fue matado.
“Los djuzgamyentos de la situasyon” en el mundo, fueron diferentes los unos de los otros:
Los Estados Unidos i la lngletera manifestaron immedyatamente sus aprobasyon por la aksyon Israelyana, “Es el ke empesa una aksyon ke es el responsavle” disho la Grande Bretanya…
La Fransya yamo a un esforso de las dos partes afin de no komprometer las ultimas posivilidades de ayegar a una solusyon pasifika i no meter en perikolo la vida i el futuro de nombrozos sitizanos de las dos partes; Alhad, Laurent Fabius fue a Ramallah i a Yerushalayim para mirar de topar una solusyon al problema.
La primera reaksyon de Mosku fue de deklarar ke “la repuesta İsraelyana fue eksesivamente fuerte”, lo ke no implika kualkyer verdadera akuzasyon.
Ay mezes i mezes ke Israel prevyene su enemigo de no kontinuar a travar roketas, lo ke puedra provokar ripostas muy duras. Ansi los dirijentes del Hamas ya savian ke la repuesta iva ser violente.
Devemos de notar aki ke es puede ser una de las muy raras vezes en la Istorya universal ke (en un konflito) uno de los dos partidos prevenga de una manera tan avyerta su adversaryo de lo ke sera su replika a kualkyer djesto portador de riskos de muerte.
Segun lo ke mos komunika la prensa oksidental, desde myerkoles pasado syenes i syenes de roketas fueron proyektas de Gaza en direksyon de Israel, lo ke mete los sitizanos del Sud de Israel en un estado de amenaza kontinual. Nombrozos payizes oksidentales entre los kualos los Estados Unidos i la Almanya demandaron al Ayifto de egzersar su influensa sovre el Hamas, el kual es una emanasyon de la Asosyasyon ‘Los Ermanos Muzulmanos’.
Las gazetas i munchos Shefes de Governos del deredor rejyonal de Israel azen remarkar kon insistensya la diferensya entre los shifros de viktimas de las dos partes … Esto es verdad i provyene provablemente de una falta de prekosyon i siguramente de la prezensya de operasyones i grupos militaryos, espesyalmente en espasyos i ambientes siviles.
Syertos payizes mas o menos neutrales de la rejyon akuzaron Israel de “krimen kontra la Humanidad” sin tomar en konsiderasyon ke ‘responder a un atake mortal por un atake resiproko’ no konstitue un krimen kontra la humanidad, ma un reflekso de oto-proteksyon i un akto de defensa personal. Las roketas dirijidas kontre Tel-Aviv i Yerushalayim provan amplemente el dezeo del enemigo de ferir i kavzar la muerte del mas grande shifro posivle de viktimas ebreas,
Esto dicho, desde Alhad pasado, kapos de governos oksidentales komo Orientales del deredor se esforsan de topar un modus vivendi…Diskusyones para ayegar a una ‘tregua militar’ (ateş kes) empesaron i kontinuan en Ayifto, debasho la prezidensya del prezidente Morsi kon la partisipasyon de un responsavle Israelyano i shefes del Hamas i Djihad.
Se syente ansi una voluntad resiproka de meter fin al konflito, todas las dos partes dezean una ‘tregua’, ma kada una egzije ke la otra empese. El Primer Ministro Israelyano Binyamin Netanyahu disho dia de alhad kel Estado Ebreo aunke pronto para anchear sinyifikativamente su operasyon militar, prefera una solusyon diplomatika.
Ke sera el rezultado definitivo? devra por seguro aver de las dos partes esforsos mutuales de komprensyon i de buena voluntad. Eyas devran syempre tener en tino ke ay madres i padres ke yoran.
El byen konosido proverbyo sefarad dize ‘’kuando muncho eskurese ,es para amaneser’’ ... En efekto es en la obskuridad la mas opaka de la noche, ke puede naser en los dos kampos enemigos, la mizma konsensya de la frajilidad de la vida i de la intensidad del dezeo de luz.
