Es ke “el antisemitizmo djihadisto ke se manifesta aktualmente en Fransya i ke (segun munchos sosyologos fransezes) es una reaksyon kontra el estado de mizerya ke persiste en los baryos periferikos ande biven los emigrados magrebanos, reaksyon renforsada por el konflikto Israelo-Palestinyano ke les syerve de puntos de apoyo ande engachar sus ira i sus ravya’ puedra un dia ser enteramente vensido? Las aparensyas son por el momento muy negativas .
De otra parte, es ke “este odyo eksterminador del djihadizmo, manifestado kontinualmente kon amenazas de eliminar kompletamente Israel de la karta jeografika de la rejyon”, puedra en el futuro provokar la reaparisyon de parselas ainda bivas del vyejo antisemitizmo Evropeo?
Es ansi ke, kon medyas palavras, unos kuantos intelektuales fransezes, partikularmente los ke son de konfesyon djudia, formulan la kestyon.
En su editoryal de la semana pasada en la revista Le Point, Bernard Henry Levy dize: “El muevo antisemitizmo ya vino. Ay muncho tyempo ke ya lo aviamos anunsyado. Ma esta vez esta aki, prezente, kon sus selulas aktivas, sus fachas emblematikas, sus golpes mortales i su aborresimyento endemiko....”
I mas leshos, en este mizmo artikolo, el filozofo presyente tambyen komo un retorno (ainda byen entendido muy ezitante) de parselas del vyejo antisemitizmo fransez; el mos dize ke aktualmente, ‘si ay Mohamed Merah i su asalto kriminal en la sivdad de Toulouse, kontra un eskola djudia, ay tambyen ‘el esprito de Edouard Drumond*, ay la mizma mala obsesyon del ‘djudyo riko i dominador’, ansi ke la solombra del ‘protokolo de los savyos’ (le protocole des sages)...
De mezmo en un teksto del prof Shmuel Trigano, ke muestro amigo Jean Carasso fundador i direktor de la revista “La lettre sepharade” tuvo la amabilidad de mandarme , ay tambyen kaji las mizmas konstatasyones kon argumentos mas o menos diferentes i kaji la mizma analiz de la situasyon aktual.
El eskrive “...La defensya i la ilustrasyon del Islam ayega syempre a un estado de akuzasyon de Israel konsiderado komo responsavle de la furor İslamika i es a este nivel ke se ve ‘el antisemitizmo del entorno’ provokado por el imajen negativo de Israel prezentado en la prensa ...”
Bernard Henri Levi komo tambyen Shmuel Trigano no son solamente ‘intelektuales de grande valor’, ma igualmente aktivistos profundamente atentivos a todo lo ke konserna el djudaizmo i syempre en estado de observasyon de la mas chika agresyon echa a su egzistensya integral .
Oy en dia, en el mundo relativamente sivilizado en el kual mos topamos, ‘akseptar pasivamente el antisemitizmo kual sea su nivel i su orijen’ es para mozotros djudyos, abokar la kavesa i entregarmos manos i pyezes atados a la dominasyon de un koryente de pensamyento salvaje .
Es una realidad irrefutavle ke en kual koryente ideolojiko ke sea, politiko, relijyozo , filozofiko o otro, ‘el ekseso’ ayega fatalmente al fanatizmo, el kual es esensyalmente portador de un refuzo del otro .... i la maldisyon ke se abatyo desgrasyadamente sovre el siglo prezente, es djustamente esta afirmasyon salvaje de si mizmo al detrimento del resto del mundo.
Si , se puede i mizmo se deve repetar ke kual sea su manadero: kristyano ,budisto, muzulmano o djudyo, ‘el ekseso en kualkyer sistema ideolojiko’ puede yegar a un solo objetivo ‘destruir todo lo ke no es si mizmo’ lo ke sera la fin del humanizmo, ‘valor superyor entre todas’.
