Septembre i Oktobre, mezes de alegria i de glorya

Klara PERAHYA Judeo-Espanyol
17 Ekim 2012 Çarşamba

Semptembre i Oktobre son los mezes bendichos ande las fuertes kalores del enverano empesan a adulsarsen,...las fyestas djudias, kada una kon  su simbolizmo espiritual, enrikesen muestro potensyal intelektual komo tambyen afektivo... i tambyen eyos son los mezes  ande los ojos  se tornan en direksyon de la Norvejya ande se toma la desizyon definitiva konsernando la dezinyasyon de los loreatos del premyo Nobel del anyo.

Premyo Nobel, premyo prestijyozo, malgrado el paradokso ke repoza en su fundasyon... koronamyento de las mas importantes deskuvyertas syentifikas ansi ke de las mas valorozas ovras literaryas, komo tambyen de las realizasyones ekonomikas las mas provechozas del anyo... i sovre todo, glorifikasyon de los esforsos echos afin de mantener i instalar la paz en el mundo, el reprezenta el mas alto punto de la reushita.

Uno de los mas sinyifikantes de entre eyos es byen entendido el Premyo de la Paz ke tyene una valor kaji kosmika i ke fue este anyo  atribuido a la Unyon Evropea.

Las reaksyones fueron por la mas parte pozitivas, ma uvo tambyen algunas parsyalmente  negativas, visto el lamentavle  estado ekonomiko de algunos payizes komo la Gresya, la İtalya o la Espanya...

Esta situasyon es por seguro muy penivle ma  no se puede nyegar, ke desde  sesenta anyos i mas,  no uvo en este kontinente kualkyer konflikto verdaderamente sanglante, lo ke es una real viktorya de la Vida sovre la Muerte i djustifika anchamente la atribusyon ke le fue echa de esta alta distinksyon..

 Esto dicho, de otra parte, alhad demanyana  mi amiga Norma Anav , myembro superyor de un ONG djudyo en la Unesko, me telefono de Paris para informarme ke  Serge Haroche  uno de los dos loreates del premyo  Nobel de fizika kuantika  es de orijen djudia.

Eya mizma no tenyendo la kostumbre de utilizar un komputer, me demando de azer una chika bushida a este sujeto, lo ke byen entendido no manki de kumplir afin de pueder transmeterle  i tambyen  transmetervos  en rezumen el chiko rezultado ke pude obtener.

Ansi, el maraviyozo diksyonaryo elektroniko Wikipedia mos ambeza  ke Serge Haroche es aktualmente ‘direktor de investigasyon’ en el C.N.R.S (Sentro Nasyonal de Bushkida Syentifika) de Fransya en su kualidad de espesyalisto de Fizika Atomika i Optika Kuantika.

Nasido en 1944 al seno de una famiya djudia de  Maroko entonses debasho del protektorato Fransez,  el emigro en Fransya a la edad de 12 anyos ande izo brilyantes estudyos eskolaryos i universitaryos i se konsakro a la investigasyon syentifika debasho la direksyon de Claude Cohen-Tannoudji.

No puedo nyegar ke resenti personalmente una grande alegria ke kero partajar kon vozotros todos.