Inosentes muryeron indjustamente a la sigida de una fantazia inyovle, ovra maldicha egzekutida por un grupo de fundamentalistos koptes de relijyon Kristyana. Komo ya lo meldimos i lo meldamos kaji kada dia en la prensa, el embashador de los Estados Unidos en Libia ansi ke tres de sus kolavoradores muryeron en un insendyo provokado salvajamente por la terrivle ravya de una populasyon ferida en su Fey komo tambyen en su dinyidad, a la sigida de la humilyasyon echa a sus mas grande profeta.
De mezmo en diferentes otros payizes muzulmanos, protestasyones munchas vezes sanglantes i mortales kontinuan a produzirsen kavzando una situasyon de tensyon nyervoza muy danjeroza. La ira esta pujando kontra un filmo estupido, mal echo segun muchos gazeteros oksidentales, mal pensado, mal djugado, mal enrejistrado, una nulidad artistika realmente lamentavle realizada en el solo eskopo de arrebashar el Islamizmo, lo ke es inadmisivle..
La reaksyon fue por seguro eksesiva, ma el motivo tambyen.
De ke derecho profanar el simbolo sakro de una relijyon?
De ke derecho arrebashar el kredo de milyones i milyones de kreentes muzulmanos, kon karikaturas i filmos difamantes?.
El filmo fue sostenido de la parte de “koptes Kristyanos evanjelistos , tal el pastor de Florida ‘Terry Jones’ ke (en un pasado relativamente serkano) avia tenido la infame ozadia de kemar publikamente egzemplaryos del Koran”.
De otra parte, la sola idea de prezentar este inyovle filmo debasho la falsa identidad de un adjente immobilyaryo djudyo, kuando en realidad se trata de un sitizano amerikano kristyano ‘kopte’ de Kalifornia mos da una idea de la indinyidad de este obskuro personaje. El dezeo sovreguadrar su propya vida i no ezito a komprometer la de inosentes.
Sin mojarse las manos, el kijo profanar la fey de milyones i milyones de kreentes, lo ke enflamo la ira de munchos luchadores Islamistos dedikados a la defensa de sus relijyon.
El kavzo fue (bendicho el Dyo) aklarado i la verdadera identidad del triste personaje nombrado Nakoula Basseley Nako, kopte kristyano, salyo a luz. La djustisya Amerikana desidara el kastigo ke el i sus kompanyeros todos koptes meresen por este dopyo krimen. Espero personalmente ke el sera muy severo afin de servir de faktor disuazivo para otros kavzos semejantes.
Algunas de las personas kon las kualas tuve la okazyon de diskutir a este sujeto, me izyeron observar ke egziste una ley ke prekoniza la absoluta libertad de Konsyensya i de palavra.
Es verdad, i eya konstitue la mejor arma kontra la opresyon, asegurando ansi la dinyidad i la libertad a kada kriansa pensante, a kondisyon byen entendido de nunka blasfemar ni umilyar voluntaryamente, i sovre todo de nunka bazar sus argumentos sovre una kualkyer mentira , komo fue el kavzo en el fakto en kestyon.
Seria muy provechozo para lo ke yamamos ‘la Grande Djustisya’, si las altas instansas judisyales mundyales prechizan klaramente asta ande puede ir la libertad de ekspresyon.
