Un anyo muevo es un presipyo (başlangıç), ke kontyene todo modo de evenementos, mos da la kuryozidad, la emosyon.
Todos devemos de ser pozitivos i realistos.
Kualo asperamos de este Rosh-Ashana?
Lo mas emportante estabilidad (istikrar) en todos los paises i partikolaramente en Israel.
Mizmo ke es difisil, kale konservar la esperansa.
Rosh-Ashana de una parte es la fyesta del anyo muevo, i de otra parte es el dia del djuzgamyento (yargı) para los djudyos del mundo entero. En este punto de vista es un paradokso.
Rosh-Ashana es la kreasyon de muevo de la persona. Dyo en este dia Santo, djuzga el mundo entero i todos los bivos (las personas, la natura) ke konkrio en mostrandoles las kondisyones muevas para el anyo vinidero.
Personalmente penso ke; las personas deven de konservar sus esperansas para pueder kontinuar a bivir, para pueder luchar kon las problemas.
Mizmo si estamos pesimistos, para pueder depasar este estado; kale ke konservemos muestra aftaha (ümit).
Tenemos en el doredor; konosidos, amigos, keridos, hazinos, personas ke estan luchando para un bokado de komer, para bivir, personas de muestro entorno, de muestras famiyas, mansevos ke se estan muryendo…
Esto todo mos esta trayendo el pesimismo, i estamos peryendo el guste, la gana de bivir.
Ma, no kale desharmos i demoralizarmos. Kale estar muy fuerte para pueder rezistir a las difikultades.
Porke la vida es una lucha (mücadele) permanente (sürekli), sin tomar reflo.
La persona tyene una tendensya (meyil) a ansyearse (kaygılanmak) por kualker koza. Mos estamos ansyeando; por el avenir de muestra famiya, ijos, ijas, padres, madres, el entorno, por muestros keridos amigos, alliados (dost).
En el dor ke estamos bivyendo; la vida esta muy difisil para todos en el mundo entero.
El dor troko, la teknolojiya muy avansada mato la valor de muestros kostumbres.
No kale pedrer la Esperansa mizmo en los momentos los mas difisiles i ariskuros.
Porke esperar; es kreyer ke va naser un muevo dia ermozo despues de todas las amarguras, de todas las penas. No se puede bivir sin esperar.
Kero partajar un kuento (öykü) ke me plaze muncho i ke no me esto akodrando a ken apartyene.
Es el kuento de las KANDELAS.
Kuatro kandelas estavan kemandosen a poko a poko. Se puediya oyir lo ke estavan avlando entre eyas; tanto el doredor estava kayado.
La primera kandela disho :
“Yo so LA PAS (Barış), ma dingunos no me esta ayudando para kemarme. Me esta paresyendo ke en serka me va amatar”, i su flama se aminguo i se amato.
La sigunda kandela;
“Yo so LA FİDELİDAD (Vefa), ma malorosamente la djente se estan esvacheando de mi. Por esto; no ay menester ke mi flama kontinua a kemar”. Kuando termino de avlar, el ayre la amato.
La tresera kandela;
“Yo so LA KERENSYA (Sevgi). No tengo mas la fuersa de kemarme. Las personas se olvidaron de mi; no estan entendyendo mas mi valor. Se olvidaron mizmo de kerer byen a los mas serkanos”. İ eya se amato.
En supito; un ijiko entro a la kamareta i vido ke las tres kandelas estan amatadas.
“Deke no estaj kemando? İ empeso a yorar.
En esto la kuatrena kandela empeso a avlar.
“No te espantes chikitiko; mi flama esta kemando i puedemos asender las otras kandelas kon esta flama”.
“Yo so LA ESPERANSA (Umut).
El ijiko gustozo tomo la kandela de la Esperansa; i empeso a asender una por una las otras tres kandelas.
Ke nunka la LUZ de la ESPERANSA no manke de muestra vida !.....
Todos mozotros puederemos azer bivir kon la ESPERANSA; la Fidelidad, la Pas i la Kerensya.
Keridos Lektores; vos oguro ke este
ROSH-ASHANA; ke seyga para todos yena de sanedad, de felisidad i de esperansa.
SHANA TOVA.
