Myerkoles pasado, la nochada aparejada debasho la prezidensya de Alain Hananel por el Dr. Seyfi İşman i dedikada a la distribusyon de los premyos de “Vertud” i de “Merito Karitativo” mos izo bivir oras dulses de alegria i orgolyo por el rekonosimyento de la valor de nombrozos myembros de muestra Komunidad i de sus asiduidad al “lavoro bendicho”del kual eyos fueron kargados.
Myerkoles la tadre fue una nochada ande, a syertos momentos, “la alegria i la dolor”, “las lagrimas i las rizas” paresian ser meskladas las unas a las otras, tal ke es syempre ansi kuando la amargura de aver pedrido un ijo pusha a kumplir a su nombre “aktos de vida”... ninguna madre ni ningun padre puedran enteramente sekar sus lagrimas por un ijo arrankado brutalmente a sus kerensya por la sola razon de ser djudyo.
El premyo “Jane Selma Elküs-Erdem Ödülü” fue partajado entre:
Raşel Özşardaş, por su asiduidad aktiva en el “Ihtiyarlara Yardım Derneği”
Sara Mori, por su lavoro sin interrupsyon desde largos anyos a la “Matan Baseter/Barınyurt”
Neama Uziel, por su aktividad en la “ Mishne Tora/Öğrencilere Yardim Derneği”
Ester Filozof, por sus presyozos servisyos al “Yetimleri Koruma Derneği”
las kualas syerven las Ovras a las kualas eyas apartyenen, desde mas de 20 anyos.
De mezmo mensyones de apresyasyon fueron distribuidas a:
Korin Yaeş Nahmias, por su aktividad en el “Dostuk Yurdu”
Eti Pinto, por su aktividad kreativa en el “Golden Age”
Feride Petilon, por su lavoro produktivo en el “Göztepe Kültür Derneği”
Sara Sason, por su aktividad en el “Neve Şalom Sinagogu Vakfı “
Hülya Doğu, por su lavoro kreativo en el “Orahaim Hastanesi”
Tuna Rozant, por fidelidad dinamika al “Yıldırım Spor Kulübü”
El premyo “Josephine Marcus Hayirseverlik”:
Fue atribuido a Rozi Üçer por su sublime i kontinual aktividad en favor del adelantamyento de la manseves en su totalidad i por la kreasyon, kon el apoyo de su marido Viktor Üçer, del fundo “Yoel Üçer” elkual asegura una partisipasyon muy pozitiva al desvelopamyento de muchos jovenes ke se topan en estado de difikultad ekonomika.
El premyo “Diş Hekimi Yasef Yahya Tıp Ödülü”:
Kreado a la memorya del dentiste Yasef Yahya matado salvajamente en un asalto terroristo syempre por la sola razon de ser djudyo, fue atribuido a “Nedi Varbarbut” estudyante briyante en la “Maltepe Üniversitesi Tıp Fakültesi.
Ansi los Nombres de “Yoel Üçer Kohen” i “Dr. Yasef Yahya” nunka kayeran en el olvido i kedaran syempre eskritos en la memorya kolektiva de muestra komunidad.
El Premyo muzikal “Yaşar Parker” fue atribuido a:
Fani Hodara, por sus performansas i su valor artistika en la egzekusyon de la muzika kontemporeana i sinematografika.
İ tambyen Renan Kohen por su briyante egzekusyon i su profunda interpretasyon al pyano de la muzika klasika.
El Premyo de Kultura fue,el, desernado a personas ke me son muy keridas:
1- Karen Gerson Şarhon por su lavoro intensivo en el kampo de la promulgasyon de la lingua djudeo-espanyola” kon la kreasyon de la revista mensual “El Amaneser” i los varyos konsertos vokales de muzika sefardi ke eya i sus partenaryos del grupo “los pasharos sefaradis” dyeron un poko en kada lugar del mundo...
2) i tambyen al prezidente aktual del Şalom İvo Molinas ansi ke al presedente Yakup Barokas por el maraviyozo desvelopamyento del semanal Şalom, el kual ancheo su programa de edisyon en syendo la boz de muestra Komunidad i en mizmo momento, en sigyendo de serka la politika mundyal i la situasyon de vida de las komunidades djudias en varyos lugares del mundo.
I el Sosyal Hizmet Ödülü:
Ke personalmente konsidero ser de una grande importansa porke marka una avyertura al “otro” ken ke sea.
El fue desernado a
- Feri Elhadef, por sus presyozos servisyos al “Down Sendromu Derneği”.
- Viki Özromano, por su lavoro en el “İşitme Engelliler ve aileleri Derneği“
- Berti Erbeş, por su partisipasyon aktiva al “Istanbul Zihinsel Engelliler için Eğitim ve Dayanışma Vakfı”.
- Violet Aroyo, por sus importantes servisyos al “İstanbul Meme Hastalıkları Koalisyon Derneği”
Myerkoles la noche fue komo un himno maraviyozo a la vida i a la rikeza de su diversidad... un homenaje a la lucha kontra la inyoransa, la insertitud i la terrivle ansyedad delantre un mundo undido en el oportunizmo, i es de todo korason ke kale saludar los ke kon sus aktos i sus performansas son komo soplos de verdad i de otentiko humanizmo.
Ay de esto unos kuantos anyos Ivo Molinas avia dicho “Çıtayı yükseltelim”... myerkoles la noche senti esto.
