La persona no bive solamente kon el pan ke kome si no ke kon la diça i el orden del Kriyador. Ansi meldamos en uno de los versetos de la peraşa; Ki lo al alehem levado yihye aadam ki al kel motsa pi ad... yihye aadam.
Devemos de aplikar todas las enkomendansas ke mos enkomendo el todo poderozo. Moşe Rabenu nos kijo dizir, el ombre tyene una valor en el mundo i el mundo fue kriyado de parte el kriyador para el ombre, i el eskopo de la kreasyon es solamente esta idea.
El ombre fue kriyado para sirvir a Dyos. El ombre no asemeja a las otras kriyansas. La kuatro pea i las aves ya vyenen a el mundo prontos kon sus vistimyentos i los atkuendos por defendersen a si mizmo sus komanyas ya las topan prontas en los kanpos.
Vinyendo a el ombre, para komer un pan deve de arar i sombrar, de arekojer su produkto azer la arina i aprontar su pan ke va komer en el orno. Ansi mizmo todo modo de mantenimyento. Para defenderse de los inimigos deve de aprontar armas. De aki se entyende el ombre todo lo ke tyene menester deve de aparejarlo el mismo.
Komo meldamos en la peraşa, kuarenta anyos en el dizyerto no tuvyeron menester de ningun aparejo, ni de vistir ni de komer si no ke el kriyador kon milagros grandes los giyo a los ijos de İsrael.
Dunke agora ke vana entrar a la tyera prometida eyos vanaser patrones de kanpos i vinyas, patrones de kazas. Estamos enkomendados de parte el grande profeta Moşe Rabenu, kuando te vas a ver entornado de kazas konfortables, i de kampos i vinyas, no diras kon mi sensya i entelijensa parvine a tener esta grande furtuna. No te olvidaras ke el Kriyador es ke nos da la fuersa i la entelijensa de azer i parvinir. Por esto es diço ke la persona no bive solo kon el pan ke kome si no ke solamente kon la diça de Dyos.
