Batya Natan

Pensar, avlar, meldar i eskrivir

“Sin aver byen entendido el poder de los byervos, no puedesh entender el poder de la persona´´... Konfuchyus

Pensar, avlar, meldar i eskrivir

Este teksto es un “exposé” de mi opinyon sovre la importansa de pensar, avlar, meldar i eskrivir i aksentuar el “poder” de los byervos ke eskojemos para avlar o eskrivir. Me aprovechi de vez en kuando, de refleksyones de pensadores,  dichas, komo una Espanyola ke dize: “Pensar es azer moabet de si para si...” Pensar…una manera de djustifikar la refleksyon del famozo pensador fransez René Descartes (1569-1650): “ Esto pensando, dunke egzisto..”.

Para syertos es sufizyente de pensar. Otros transforman sus ideas en byervos, en konversasyones. Aki, una dicha de Pascal,  filozofo i grande persona  de sensya del 17. Siglo. En su ilustra ovra “Pensées” (pensadas), el dize: “El benadam  pensa, dezea saver, dezea ambezarse para pueder kontar, para provar su saverisyo...”.

Ay  los ke tyenen pasensya, una buena doza del amor de la pendola i un syerto talento. Dezean ke estos byervos seyan konkretos, preto sovre blanko, eskritos o imprimados. Munchos grandes eskrivanos empesaron kon “diarios” yamados “jurnal intim”. Eskriviyan sentimyentos o interpretasyones de lo ke enkontravan… O estoryas, kuentizikos, poezias kon una alma de amator... Naturalmente, los ke tyenen la intensyon de azer karyera de eskrivano o jurnalisto, deven tomar una instruksyon apropyada.

Para pueder tan poko, reushir a eskrivir, se deve ser buen observador i amigo kon los livros, segir, meldar publikasyones, azer bushkidades, estar al koryente de la aktualidad ets... Al lado de esto todo, yo konsidero ke es un dono presyozo el saver profitar de la “fuersa de los byervos”, seya en avlando, seya en eskrivyendo. Es primordial de utilizar en su lugar, estos byervos ke mos ayudan a krear un lavoro... Mos prokuran la egzaltasyon de aver kreado un teksto, afilu si es un simple, kurto artikolo o una emosyonante poezia...

İ aki un proverbo Kinezo:  “El ombre sezudo melda los livros, ma melda tambyen la vida.”  Syempre repeti ke la vida es una eskola. En realidad, kale atorgar ke eya mos esta dando sujetos para relatar o komentar, sujetos ke se instalan en un kantoniko de muestra memorya asta el momento ke  la persona syente komo un menester de partajarlos kon otros. Es el momento para mi de  asentarme enfrente la komputedera i ampesar el “moabet” kon mis lektores.

Syertas bushkidades amostran ke eskrivir, transferar los sentimyentos, las ideas a una oja blanka, amengua la “sanya” i la “depresyon”. No se ke grado es egzakto, ma de una koza esto sigura. Eskrivir es komo una “terapiya” ke libera la persona. A ke edad ke kere ke seya se puede ampesar a eskrivir. Un chiko rekuerdo, una anekdota, un kuento o estoryika. Ya se ke syertos de entre los lektores keren eskrivir. Ma estan detenidos por una “timidita” o estan dizyendo: “ Despues de agora kualo va eskrivir?”. Keridos amigos, “mas vale tadre ke nunka...”.

La edad no deve ser un impedimiento. Konsernando djustamente esta kestyon de edad,  en pasadas meldi un “espri” de la parte del aktor amerikano Clint Eastwood ke deve tener la mizma edad miya. El disho: “Dayinda me esto sintyendo komo tener 20 anyos... Ma, esto me esta akontesyendo menos frekuente!!!...”

Estas refleksyones del aktor son egzaktamente lo ke penso yo. Portanto, desde un syerto tyempo, muy ralamente me esto sintyendo komo tener 20 anyos, afilu ni 30!!!... Ma, esto no kere dizir ke no vo kontinuar a azer moabet kon los keridos lektores... Kedad en buena ora…

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
568