De muevo una desgrasyada matansina en los Estados Unidos… En una eglisya Sikh** 7 personas fueron matadas en estado de orasyon (por un ombre de kuero blanko, segun uno de los testigos)… syete inosentes en un momento de konsentration espiritual pyedreron la vida sin kulpa ni pekado.
En el espasyo de unos kuantos dias, es el segundo kavzo semejante en la Amerika del Norte. Ke se esta pasando en el meoyo de estos matadores ke perpetran sus aktos kriminales sin razon definida, al pareser pushados por una pulsyon asasina, asta kerer annihilar todo lo ke es portador de vida ?…
Ke fue el motivo real? No se save egzaktamente i puede ser nunka se savra la verdadera razon. … Djesto de lokura o byen de revolta ? menester de tomar vengansa ? ma en este kavzo, deke echar su ravya sovre inosentes ?
En ningun kavzo, esto puede ser komprensivle ni akseptavle, kuando se pensa a la enorme sufriensa ke esto provoka ... la sufriensa de estos dezmazalodos ke se rekojeron en sus templo para orasyonar …
Una otra ipotezis esta tambyen konsiderada : ‘un ekseso de ultra nasyonalizmo amerikano’, lo ke seria muy muy grave para el payis el mizmo en su dinyidad ansi ke para una grande parte del resto del mundo ke konsidera la Amerika del Norte komo el simbolo de una estabilidad mas o menos segura.
Dias de mas a mas obskuros de dolor, dolyo i espanto ande es muy difisil i muy improbavle ke pueda floreser kualker premisyo de mijoria….
Ke pensa el governo? Es ke el payis ke fue durante un largo tyempo ‘’la mas grande Potensya del mundo’’ no esta konsyente del peligro ande se topa su populasyon ?
Payis de savyos, de progreso syentifiko i tekniko, payis de libertad el kual era un refujyo para los fujitivos maltratados… ma payis tambyen ke malorozamente konservo en un chiko espasyo de su pensamyento el kulto de su grandor al nivel universal, los Estados Unidos son eyos tambyen, portadores de una grande frajilidad.
El governo prezente aunke frankamente sosyalisto, metyo un largo tyempo asta pueder obtener la ratifikasyon del tan humano proyekto de seguridad medikal.
El lucha de mezmo (sin obtener kualkyer rezultado pozitivo) para dekretar la prohobisyon de vender armas i materyal adekuado, si el merkador no prezenta un permeso espesyal de la parte de las otoridades, esto afin de evitar semejantes desgrasyas…
Es ke Obama puedra enfin reushir en su kombate, si el es de muevo elijido? Ninguno puede asegurar kualo ke sea a este sujeto.
