I de muevo la mizma ambivalensya de kada koza

Puede ser ke sera syempre lo mezmo a traves lo siglos… En kada koza, kada evento i tambyen en ‘‘kada persona en su trayekto a traves el tyempo i los varyos insidentes de su vida’’, se ve la mizma ambivalensya , las mizmas dos fachas (la una luminoza i la otra obskura) de kada kriansa humana komo tambyen de kada akontesimyento, kualas sean sus dimensyon i importansya.

Klara PERAHYA Judeo-Espanyol
8 Ağustos 2012 Çarşamba

Desde mas de una semana  Los Djugos Olympikos mos azen konoser dias de entuzyasmo al nivel kaji  mundyal , oras  dedikadas a un enfokamyento  por ansi dezir pasyonal de los tres kuartos del mundo , los ojos fiksos sovre el chiko ekran , asta olvidarsen el marazmo de la epoka ande mos topamos i mizmo (problema al pareser insoluble) la trajedia de la guerra sivil en Siria ande syenes i syenes de personas mueren  si no en la indiferensya ma en un estado kontinual de ‘no asistansya’ de la parte del resto de la umanidad …

Si, las olympyadas fueron komo una enorme evazyon en un universo diferente, echo de grandor i de superyoridad i por unos kuantos dias, esto arranko munchas personas de este djenero de apatia ande poko a poko  eyas se estan undyendo sin rendersen kuento.

Ma ke ay debasho esta rikeza de enerjias i  aspirasyones de los djugos Olympikos?

 En la antiguidad, eyos eran ekskluzivamente rezervados a los solos individuos de orijen  heleniko… eyos eran kompuestos de konkorsos entre varyas sivdades gregas a los kualos ningun individuo estranjero , ni ninguna mujer de ke orijen ke fuera, tenia el derecho de partisipar.

 Muncho despues el Renasimyento , epoka sublime dedikada a la kultura intelektual, en el 19en siglo ,  fue  la reaparisyon del intenso dezeo de reempesar estos mizmos konkorsos de enerjia fizika entre diferentes potensyas mundyales, konkorsos ande puedian unikamente partisipar  puevlos enteramente libres, por la mas parte kolonyalistos i dominadores en sus otoridad.

Kualkyer nasyon kolonizada, konsiderada komo inferyor no era akseptada , i no ay dubdyo, ningun djudyo tambyen.

Ken dize  ‘supremasia de fuersa’  kuala  sea esta fuersa, dize  ‘desdenyo por todos los ke son konsiderados komo flakos , lo ke fatalmente pusha al segregasyonizmo.

Un artikolo sinyado por el filozofo Salvatore Schiffer i datado del 1/08/2012  mos dize :

“Ah la flama olimpika, este simbolo de las Olympyadas!  Eya esta briyando kon su inkomparavle intensidad, i la planeta entera se topa en estado de ekstaziz.

Ma ay puedeser algunas razones de mostrarmos muncho manko entuzyastos delantre esta idea de transportar (en una korrida ininterrumpida), esta  flama ke devino aktualmente  el simbolo  de los Djugos Olympikos, desde la sivdad grega ke les dyo sus nombre i ande se produzyeron los djugos  antiguos, asta el estadyum ande kada kuatro anyos okure este evento grandiozo…

Si,  ay seguramente razones de ser manko entuzyastos, kuando mos ambezamos ke en realidad esta idea salyo del meoyo de un dinyitaryo naz nombrado Carl Diem.” (el kual sirvyo a azer briyar la obskura estrea de las orrivles teorias de Hitler).

Esto me pusho a azer una chika bushkida a este sujeto i en efekto komo mo lo ambeza el dicho filozofo Salvatore Schiffer, esta idea (de transportar la flama a travers multiples payizes) fue aplikada por la primera vez en las maldichas Olympyadas de Berlin del anyo 1936, las kualas fueron “las Olympyadas de la Verguensa’’.

Pierre Courbertine un de los mas importantes promotores de los ‘Jugos Olympikos modernos’  fue el ke , en una atmosfera empapada de antisemitizmo, konfio  al governo Hitleryano el onor de asumir esta grandioza karga.

Fuerte nasyonalisto fransez, Pierre Courbertine tenia una grande admirasyon por las teorias  fashistas ansi ke  por las ideas de Charles Maurras i del doktor Alexis Carrel ,  los kualos prekonizavan ‘la supremasia de la Fuersa a ke presyo ke fuera’, asta eliminasyon absoluta  de los ke eran konsiderados komo flakos , teorias segun las kualas  ‘la rasa   aryana’ era el simbolo el mas karakteristiko de la verdadera grandor.

Esto fue el empesijo de los  ‘’Djugos Olympikos modernos’’…despues, uvo la segunda gerra mundyal, la desgrasya  del hitlerizmo ansi ke la inimajinavle orror de la Shoah… i muncho despues la gerra, poko a poko  a un ritmo malorozamente  muy  avagarozo , la konsyensya humana empeso a despertarse.

Si komo dicho mas arriva, syempre es la mizma ambivalensya de kada koza i relativamente de kada persona en su desvelopamyento a traves el tyempo …syempre las dos  fachas del mundo i del ombre, la una  luminoza i la otra obskura .

….A kada persona la responsabilidad de eskojer entre eyas dos.