Lo ke la Prensa estranjera mos ambeza

Referandose al Kotidyano İsraelyano Haaretz, el diaryo elektroniko fransez “Le Figaro“ datado del 29 o 30 Djulyo mos dize debasho el titolo: “Obama et Romney se disputent les faveurs d’Israel”, ke los dos kandidatos a la prezidensya de los Estados Unidos estan, kada uno de su parte, azyendo la korte al Primer Ministro de Israel.

Klara PERAHYA Judeo-Espanyol
1 Ağustos 2012 Çarşamba

 

El eskrive ke Barack Obama desvelo a Netanyahu planos de asaltos amerikanos kontra el Iran i ke Tom Donilon (su konsejero sovre las kestyones de Seguridad) prezento al shefe del governo İsraelyano  los proyektos  de una ofensiva kontra  este mizmo payis.

Vinyendo a Mitt Romney, kandidato Republikano, el afirmo, dia de Alhad durante su vijita en la Sivdad Santa, ke kale syempre mantener la opsyon militarya afin de impedir la “Lokura nuklearya del Iran”... i, ainda mas sorprendyente, el propozo de azer de Yerushalayim la kapitala de Israel.

Komo se entyende byen, el negosyador Palestinyano Saeb Erakat protesto i afirmo immedyatamyente ke estas deklarasyones son inakseptavles i muy danyozas para los interesos Amerikanos en la rejyon.

Munchos komentadores van mizmo asta dezir ke el kamino para ayegar a la Kaza Blanka pasa por Yerushalayim.

De su parte, el buro de Benyamin Netanyahou desmentyo todos estos komentaryos.

Una sola koza es segura, eya es ke Barack Obama  no keda nunka de prezentarse komo el mijor garante de la seguridad de Israel, todo en esforsandose de persuadir el Primer Ministro İsraelyano de no intervenir en Iran antes la eleksyon prezidensyal Amerikana.”

Ansi eskrivyo ‘Le Figaro’ referandose a lo ke publiko el diaryo Israelyano Haaretz.