Batya Natan
Batya Natan

En el Sentenaryo de la undisyon del Titanic la estorya de: LOS ERMANOS STRAUS

Empesijo del 20. Siglo, los  ermanos multimilyonarios, Nathan i İzidor Straus fueron muy renomados en los Estados Unidos, por sus filantropiya i sus aktividades sosyal. Eran patrones del famozo “R.H.Macy’s Department Store”. Fueron fundadores de la kavena de magazenes “Abraham & Straus”.

En 1912, djuntos kon sus kondjuntas,  viajando en  Evropa, Nathan, ardente Sionisto  disho impulsivamente: “Ke dizish de dar un salto a Palestina?” Akeya epoka la tyerra d’Israel no era sentro atraktivo turistiko. Sus abitantes biviyan mas o menos en la estrechura. Los ermanos Straus, posedavan un fuerte sensyo de solidaridad  enverso sus ermanos djudios desfortunados. Tambyen dezeavan ver kon sus ojos propios los establesemientos sanitaryos, los sentros sosyal i institusyones kreados i fundados kon los milyones ke mandavan  eyos.

Malgrado su “sensyo de solidaridad”, a la fin de una semana en Palestina, İzidor se enfasyo i disho: “Kuantos gameyos, kuantas maabarot, (barakas) kuantas Yeshivot puedes ver? Basta! vamos de aki”. Ma, Nathan refuzo de dar importansa al orden imperyozo de su ermano. Djustamente, era por modo ke i el estava remarkando el negro estado del derredor, ke keriya kedar en Palestina para pueder personalmente mas ayudar.

Estava pensando ke el lavoro ke se aviyan entremetido a azer kon los ermanos djudios los aviya tambyen kargado de una grande responsabilidad. Nathan le disho a su ermano ke no deviyan deshar todo i partir. Fue ansi ke le respondyo a su ermano: “Mira, dayinda ke lavoro ay de azer. Devemos ayudar. İ tenemos los remedyos de ayudar. No puedemos dar la espalda a muestro puevlo.”

“Si pensas ke es ansi, les puedemos embiyar  mas muncha moneda” disho İzidor. Yo lo ke kero es partir de aki una ora mas antes!.”

Ma, Nathan estava pensando ke no era tan simple. Estos djudios estavan bivyendo en una grande afrisyon en Palestina i kondisyones bastante difisil. Nathan teniya el sentimyento ke esta djente nesesitavan la prezensia de un ermano, de las inisyativas de un lider. Malorozamente Izidor no estava de la mizma idea. Los dos ermanos tuvyeron fuertes  diskusyones. Izidor a la fin disho: “Si estas insistyendo kedate aki. Yo kon İda, tornamos a la Amerika, ande apartenemos”.

Los dos ermanos se separaron. Izidor torno a la Evropa, Nathan kedando en Palestina. El i su mujer, traversaron el pais, ayudando, lavorando... İzo grande kontribusyon a los programes de edukasyon, ayudo materyalmente los menesterozos. Finanso tambien la kreasyon de una sivdad en el bodre del Mediterraneo. El grande donador fue Nathan. Por esta razon los fundadores dechidaron de dar a esta sivdad enteramente mueva, el nombre del grande filantropo: NATANYA...

İzidor apenas torno a la Evropa, ampeso a azer preparasyones para el retorno a los Estados Unidos. İzo rezervasyones para un nave “Transatlantik”, tambien para Nathan i su mujer. En el telegrafo urjente ke mando İzidor de Londra, le eskrivyo ansi: “Devesh deshar la Palestina, i DE VİSTA! İze rezervasyones en el nave i para vozotros. Si no vinish  en tyempo, lo vash a mankar”…

Nathan no estava dezeozo de partir de vista, por no deshar el lavoro en medyo. Se kedo asta el punto de alkavo. Kuando arrivo a Londra, era el 12 de Avril. El nave ya aviya partido del porto de Southampton, İzidor i İda a su bodre. Nathan estava triste, konfuzo, porke su ermano ya lo aviya prevenido de “no mankar el nave”. Su ermano le aviya eskrito ke este viaje no iva ser una ordinarya “kruazyera”, syendo la estrenadura del mas famozo “transatlantik” del siglo: el TITANIC...

Nathan en su profunda dolor, diya i noche no se estava impediendo de pensar: su ermano i su kunyada se aviyan ido al “rendez-vous” kon la İstorya. Todo el resto de su vida, Nathan bivyo kon el sentimyento de aver eskapado de la muerte. Kontinuo sus aktividades filantropikas. Dinguno en su tyempo, alkanso al nivel de sus bienfezensyas. Muryo en 1931.

Oy Natanya es un sentro turistiko renomado, el “Kuartyer Jeneral” del negosyo de diamantes. (una de las mas importantes industriyas del pais). En kada kanton de la sivdad, se puede ver un rekuerdo de la jenerozidad de Nathan Straus, de su umanidad, del amor por su puevlo. Su erensya esta bivyendo...   

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
628