Dos anniversaryos en el espasyo de unos kuantos dias, dos eventos muy importantes en la istorya i el destino del puevlo djudyo... Ay de esto 60 anyos, era “el dolyo ansi ke la desgrasya del aborresimyento enverso la totalidad del djudaizmo en un mundo inkoherente entregado a fuersas oskuras” i unos kuantos anyos despues “la esperansa i la gloryoza alegria de tener enfin un avrigo seguro, kaji un refujyo para el puevlo de Yehuda...”
Aktualmente tambyen, este odyo mos persige debasho un otro nombre el kual simplemente troko de “antisemitizmo” a “kritika otomatika i munchas vezes indjusta kontra la politika Israelyana”.. Oy en dia, mizmo kuando el anti- djudaizmo no se manifesta klaramente, el esta syempre prezente, pronto a umilyar i golpear los muestros, kon o sin razon, lo ke paradoksalmente enfortese ainda mas muestra rezistensya.
I syempre la mizma pregunta ke invariavlemente keda sin repuesta: “Deke a traves los siglos este mizmo menospresyo espontaneo?” Deke esta terrivle absensya de objektividad en el djuzgamyento i esta obstinasyon a kulpabilizar Israel i el puevlo djudyo, en ke lugar del mundo ke sea?
Ainda unos kuantos dias antes, el premyo Nobel Alman Günter Grass (ke su kondisyon de intelektual devra pushar a manifestar un poko mas de sezudes en su manera de pensar) afirmo en una de sus eskritas, ke Israel es “el grande perikolo del Oriente Medyo” en amenazando de destruir el sistema nuklear del İran, potensya de la kuala el prezidente avia deklarado i deklara syempre avyertamente su dezeo i su intisyon absoluta de eliminar totalmente Israel de la karta jeografika de la rejyon.
“Esta refleksyon del poeta alman” mos aze akodrar lo ke fue el nazizmo al kual el mizmo avia aderado personalmente en el korso de su mansevez. Entonses el tenia puede ser la ekskuza de no aver ainda ayegado al nivel de madurez nesesaryo para refuzar o luchar kontra una teoria kriminal; ma oy, insipirarse del mizmo esprito de odyo... oy, despues de la Shoha, esta simple remarka inkomprensivle en la boka de un intelektual de su dimensyon, tyene el sonido de lo ke fue la terrivle trajedia de 60 anyos antes, la kuala no solo fue la mas destruktora ma sovre todo la ke tenia en su programa “la absoluta erradikasyon i eliminasyon” del puevlo ke fue el primer a resivir el Monotheizmo i a introduzir la ethika i el universalizmo en su kodigo relijyozo.
Sovre ke paradigmo moral, Günter Grass se bazo en formulando esta remarka? Kual presepto de lojika (indispensavle al djuzgamyento de un intelektual) pudo pusharlo a egzijir de Israel “una absensya absoluta de reaksyon” a las amenazas formuladas por el kapo de una poderoza nasyon enemiga?
Es kontinualmente ansi del destino djudyo, syempre echo de dolor, de espanto i anksyedad, ma tambyen syempre pushado por una fuersa invizivle a luchar por la djustisya i el humanizmo... “la djustisya, la djustisya la siguiras”.
