Alüminyum Hurda Geri Dönüşüm

UNA TRAJEDİYA de antes 70 ANYOS...

UNA TRAJEDİYA de antes 70 ANYOS...

Vyernez, el 24 de Febrero 2012, se organizo aki una seremoniya  komemorativa de la desgrasya de “Struma”. Muestra amiga Klara Perahya ya eskrivyo sovre el diya de Komemorasyon de esta Trajediya ke akontesyo antes 70 anyos, en el korso de  la Sigunda Gerra Mundial. Struma es un simbolo ke kedo por syempre entre los fragmentos de mi memorya.  Fin de 1941 i empesijo del 42...Yo, apenas de ocho (8) anyos. Malgrado mi chikes, esta epoka  me desho lo mas de trasas i rekuerdos. Ma, de otra parte, mi edad no me permetiya de realizar i entender la importansa o la sinyifikasyon egzakta de los evenimyentos trajikos ke estavamos bivyendo.

Portanto, komo munchas kozas de la epoka, el nombre “STRUMA” kedo gravado en mi memorya. Moravamos en Galata, un etaj bastante alto, en el Saffet Bey Apt., ke tanto nombri en mis rekuerdos. Seya de muestra ventana, seya de la grande tarasa del “ruf”, del techo, teniyamos una vista muy ancha, inkluzo i Sarayburnu. De este punto de vista, sin konoser la realidad, yo estuve vyendo el “Struma” todo el tyempo ke estuvo ankorado ayi. 

Kuando suviyamos a la terasa kon el vizindado, kada uno diziya una koza sovre esta nave. Fue ansi ke sinti komentaryos kontradiktoryos, yerrados. (lo entendi munchos anyos despues). Era la epoka ke mi papa estava azyendo el servisyo de las 20 klasas. No teniya a ken demandar, malgrado mi kuryozidad. Anyos pasando, mi padre, komo uzava syempre, me dyo syertas informasyones, asigun lo saviya el, kero dezir, no muy egzaktas... Muy probavle, fue achakes de esta “dezinformasyon” ke “Struma” kedo kon puntos de interrogasyon i me pusho a azer investigasyones mas despues.

“STRUMA fue alkilada por los Djudios de Rumaniya, pais ofisyalmente antisemit a la epoka. Era una nave vyeja, muy eskaida rekuperada del fondo del “Danube” (Tuna Nehri)  i reparada vezes i vezes. Durante la Sigunda Gerra Mundial, la nave transportando los emigrantes Djudios a Palestina, akel tyempo debasho el kontrol de los İnglezes, arrivo el 15 Desembre 1941 a Estambol”.

Estuvo detenida asta el 23 Febrero 1942, myentres las negosyasyones entre el Governo Britaniko i el Turko, ke no alkansaron a dingun rezultado. 23 de Febrero, sin asperar la fin de los tratos, Struma fue abandonada a su suerte, la Mar Preta. La nave torpilyada kavzo la muerte de 768 almas. El solo ke salvo fue David Stoliar, un manseviko de 16 anyos a la epoka. Detenyendose a un pedaso de los restos de Struma, serka  la oriya de “ŞİLE”, fue salvado por un peshkador turko, İsmail Aslan. (syertos manaderos afirman ke Stoliar fue salvado por las ekipas ofisyal de kontrol kostal). Portanto, yo meldi muevamente ke en el anyo 2005, Stoliar vino a Estambol para enkontrar su salvador, İsmail Aslan. 

Por anyos, esta trajediya kedo komo una enigma, solevantando espekulasyones, diversas teoriyas sovre la eksplozyon ke kavzo la fin de Struma. En 1964, un istoryano aleman pretendyo deskuvrir el responsavle. Era un sumaren  sovietiko. Mas despues, esta supozisyon fue achetada i konfirmada por diversos manaderos i otoridades ofisyal Rusos. Myentres la Sigunda Gerra Mundial, los Rusos estavan sospechando los Alemanes de transferar klandestinamente aryento de la Russia, armas via la Mar Preta. Por esta razon, los sumarenes aviyan resivido el orden de torpilyar todo modo de nave non identifikada o sospechoza.

En Julio 2000 un grupo de investigadores Turkos, deskuvriyeron una ruvina en el fondo de la Kosta supozada ser kaji el lugar egzakto de la undisyon de Struma. Ma, ni esta, ni otras bushkidades en la rejyon dyeron rezultados satizfezyentes sovre la identifikasyon de “Struma”. En el 3 Septembre del mizmo anyo, se organizo una seremoniya de komemorasyon ande partisiparon serkanos de las viktimas. Tambien, un reprezentante del Governo Israelyano i el ambashador de este pais, reprezentantes de la Komunidad Djudia de Turkiya ansi ke delegados Britanikos i de los Estados Unidos.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın