Alüminyum Hurda Geri Dönüşüm

LUCHA ETERNAL de la MUJER

LUCHA ETERNAL de la MUJER

En “El Amaneser” de este mez, (no 85) eskrivi un teksto en akordo kon el 8 Marso, “Diya de los Derechos de la Mujer”. Desde ke ampesi a eskrivir en esta pajina, puedo dizir ke syempre tuve el uzo de azer un artikolo sovre este diya. Asigun va remarkar el lektor, en el sovredicho teksto de muestra revista, me aserki a la kestyon de Derechos de la Mujer, de una ventana mas diferente i a mi opinyon bastante enteresante.

Avlaremos un poko de estos derechos… Kualos son? En una fraza, se pueden rezumar ansi: Derechos ke asiguran a la Mujer igualidad kon el Ombre seya en la vida komun, seya en otros domenos. Desde el 18. Siglo, las mujeres lucharon para impedir las inigualidades proveniendo del fakto de ser “mujer”. Lucharon para obtener los mizmos derechos ke los ombres, en todas las profesyones (o kaji todas), diversas karyeras, en la vida politik,  en el domeno de instruksyon i produksyon ets..

La Organizasyon “Movimiento de la Libertad de la Mujer” dyo una lucha ardente para obtener los mizmos derechos sosyal de los ombres, la libertad de instruksyon, de lavorar ets… En syertos derredores estas demandas provokaron reaksyones negativas. Por esta razon el Movimiento kamino muy avagar. Finalmente la O.N.U deklaro el anyo  1975 komo “Anyo Universal de la Mujer”.

Asigun syertas opiniones, el empesijo de esta lucha de las mujeres,  tyene sus raizes  en los anyos de la Revolusyon Franseza. Komo se save, akeya epoka, las mujeres (diremos) “reformistas” partisiparon a la revolusyon ombro a ombro, al lado de los ombres. Portanto, no se puede dizir ke la parola o el “motto”  “Libertad, İgualidad, Fraternidad” trusho grande trokamiento en la situasyon de la Mujer en “jeneral”.

El paragrafo presedente se puede konsiderar komo una jeneralidad. Aun ke no reflekta  enteramente mi idea i mis puntos de vista, devo achetar ke ay una parte de realidad. Egzakto, la igualidad parese egzistir. Ma en la pratika? Malgrado los anyos i las luchas ke dyeron, kuantas mujeres reusheron alkansar a sus butos?.. Bueno, por siguro munchas. Ma no todas.

En prinsipyo, la igualidad fue syempre al orden del diya en las demokrasias del Oksidente. Portanto en estos paises las mujeres tuvyeron a dar grande luchas para pueder alkansar al Derecho de elijir. El importante dokumento rezultando de esta lucha fue el “Akordo sovre los Derechos Politik de la Mujer”, achetado en la O.N.U i entrado en vigor el Julio 1954. A ser ke, aki en Turkiya, desde el 1934 las mujeres ya aviyan ganado el derecho de votar i ser tambien elijidas.   En el 1935 las estamos vyendo ke uzaron este derecho. En las eleksyones   diversas fue portanto  un chiko shifro de mujeres ke reusheron a devenir parlamentaryas.

Probablemente, va ser konsiderada komo  pesimista en ekspozando syertos de mis puntos de vista. Porke, devo dizir ke aktualmente no se puede pretender un importante amijoreamiento en el estado  de un grande shifro de mujeres. Los rezultados de syertas enkuestas amostran ke en diversos paises o komunidades uvo muy chiko trokamiento en el estado de las mujeres. Se trata por lo mas, de presyones tradisyonal, relijyozas o diversos uzos i kostumbres ets…ke son seryozos obstakolos delantre la emansipasyon i libertad suyas.

 Se puede diskutir o eskrivir ojas i ojas sovre este sujeto, lo ke no troka la realidad. Es un sujeto ke reelmente  reyeva diskusyones seryozas kon espesyalistos i personas kompetentes. De vez en kuando miro de segir en la televizyon programas ke se estan  azyendo sovre las mujeres maltratadas por sus maridos o kompanyeros. Es un poko a la luz de lo ke esto vyendo, sintyendo o meldando ke esto azyendo estas  linyas.

Naturalmente, ay i la facha optimista. Estamos vyendo muestras ijas, inyetas en diversos terrenos profesyonal. Tyenen la libertad  i el “Derecho” de azer altos estudyos. No puedemos enyegar la grande evolusyon ke kumplieron las mujeres en el korso de los anyos. Las enkontramos en la Administrasyon, Ekonomiya, Medikeriya, Derecho, Sensyas ets… Esto mos glorifika dandomos tambien esperansa para el futuro. 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın