Teruma

Rav Yeuda ADONİ Köşe Yazısı
22 Şubat 2012 Çarşamba

Kon el komondo del Kriyador, rekojo Moşe Rabenu a todo el puevlo cudyo i les enkomendo por la fragua del Tabernaklo (mishkan santuvaryo). El les dyo a entender kada koza i koza klaramente ke manera tyene ke azerse i los akavido antes de todo de no ezbivlar i azer ninguna ovra mismo para el mishkan en diya de Shabat. Syendo este diya es el prensipal sinyal del cudaismo. İ todo el puevlo kon muncha kerensya izyeron sus donos para esta ovra santa,kada una sigun su posibilidad. İ enpesaron apunto en la ovra. Todos los savyos ke no mankavan de entre el puevlo de ombres i mujeres lavoraron en esta santa ovra solo direksiyon de Betsalel niyeto de Huv del Trivo de Yeuda i de Aaliav del Trivo de Dan enterval de 5 mezes se termino todo este lavoro. İse lo yevaron todo a Moshe Rabenu i vyendo ke todo esta custo sigun lo ke enkomendo amostro su kontentes i los bendisho.

Sovre el komando del Kriyador ordeno Moshe Rabenu, i el mishkan fue estrenado en el primer diya de nisan de este anyo. Metyo kada koza  en su orden. Las tavlas de la ley ke estavan en su tyenda, las pozo diyentro el Aron Akodesh. Ke izyeron de un syerto palo de Pino muy alavado nombra Shita - Shitim - i kuvyerto de oro por adyentro i por afuera i los tapo el Aron Akodesh kon el kaporet ke era una tavla de oro godror de un palmo. Despues de azer todo lo ke enkomendo el Kriyador se kuvryo el mishkan de una nuve. Esto fue un sinyal por el avinir, ke dizde akel diya, todo tyempo ke estava la nuve sovre el mishkan no se meneyava el puevlo de onde estavan pozados. Kuando se alevantava la nuve se levantavan el puevlo i se ivan kaminando asta ke poza otra vez la nuve sovre el mishkan pozavan i eyos.