Los Judios Pretos i la Muerte de Whitney Houston

Dora NİYEGO Judeo-Espanyol
22 Şubat 2012 Çarşamba

La kantadera i artista Whitney Houston, ganadera de sesh premios Grammy, muryo el onzen de Februar, diya de Shabbat, en Beverly Hills Hotel, en Los Angeles. Houston teniya kuarenta i ocho anyos. Kuando muryo, la kantadera estava en Los Angeles, por la selebrasion de los premios Grammy, ke iva tener lugar la noche suivante, noche de Alhad.

Whitney Houston era una de las primeras mujeres pretas ke alkanso a azerse una ‘superstar international’. Houston fue enspirada de las kantaderas de soul de su famiya en New Jersey. Su madre Cussy Houston, sus primas Dionne Warwick i Wee Wee Warwick, i su nona Aretha Franklin, fueron kantaderas grandes. Whitney resivyo munchos premios Emmy, Grammy, i premios Billboard de la muzika. La kantadera tambien gerreyo munchos anyos kon las drogas, i el abuzo del achohol.

Su popularidad pujo mas muncho en los anyos 1980’s i 1990’s kon el ‘single hit’ ‘I will always love you’ del soundtrack del filmo ‘The Bodyguard’, ande eya djugo el rolo primer.

Una otra parte de Whitney Houston, ke es mas manko konosido, es ke en el anyo 2003 la kantadera vijito el estado judio ke lo yamava ‘pais espiritual’. Houston se topo kon el Primer Ministro de İsrael, i paso tiempo kon la komunidad de los judios pretos  de İsrael, ke biven en el dezerto de Dimona.

Los judios pretos  son un grupo amerikano ke emigraron a İsrael, en los anyos 1960’s. Este grupo kreen ke eyos son los desendientes  de los miembros de la tribu de Yudea, ke fueron embiyados afuera de la tierra de İsrael, duspues ke los Romanos destruyeron el Segundo Templo en el anyo 70. Los judios pretos kombinaron elementos de la kultura afro-amerikana en sus enterpretasion de la Biblia, i no akseptan el Talmud. Este grupo obzervan el Shabbat, i las fiestas judias. Los ombres se visten tzitzit enriva de sus kamizas de tipo afrikano, i les azen berit a los muevo nasidos. Los judios pretos son vejetarienos, i se visten vistimientas echas de ilos naturales. La majorita de los ombres tienen mas de una mujer, i el ‘kontrol de nasimiento’ no es permetido entre eyos.

Kuando los primeros pretos judios vinieron a İsrael en el anyo 1966, eyos kijeron aprovecharsen de la Ley de Retorno. El governo israeliano desido a no akseptarlos komo patriotos, i no les dio el permito de lavoro i los benefitos del estado. El grupo akuzo al governo de diskriminasion rasial. Ma las razones eran diferentes. E l governo no tomo dinguna aksion ofisial para mandarlos atras. Solo los ke lavoraron ilegalmente fueron deportados. En el anyo 1990, los amerikanos les ayudaron a negosiar un akuerdo para ser akseptados komo patriotos israelianos. En el anyo 2006, los judios pretos resivieron las kondisiones del statu de rezidente permanante.

Oy, los pretos israelianos tienen un koro de gospel, ke kamina  İsrael i los Estados Unidos. Esto grupo tambien tienen restorantes en munchas sivdades de İsrael.

En el anyo 2003, kuando Whitney Houston vijito İsrae,l este grupo atiro mas muncha atansion publika. En el anyo 2006, el preto israeliano Eddie Butler reprezanto İsrael en el festival de Eurovision.

En estos diyas, los pretos israelianos estan en dolyo por modo de la muerte de Whitney Houston. Ben-Ammi Ben-İsrael ke es el lider de un grupo de 2500 miembros, disho ke eyos la konsideraron a Whitney Houston komo sus ‘ija espiritual’. Ben-İsrael, un konduktor de otobus, esta diziendo ke Whitney Houston fue un grande orgolyo por la komunidad de los pretos israelianos.