Alüminyum Hurda Geri Dönüşüm

Espantos i reselos

Un pensador tyene dicho ke “La sekana prevista, no es tan perikoloza”... Es ke puedemos liberarmos de muestros espantos o reselos? No se komo responder a esta demanda. En kavzo de si, seriya una koza maraviyoza. En la dicha de arriva, se esta dizyendo,  si se konose de antes, el perikolo amingua. A ke grado sera rezya una ipoteza semejante?. Asigun mi, es un poko difisil de abandonar muestros espantos, a lo menos syertos. Syempre va aver muevos orijines, muevas razones de reselo o espanto, de una manara o otra.

Una vida sin reselos!… Esto es solamente un suenyo. Alora, ke se puede azer? Naturalmente, no tengo una formula majika. Lo ke puedo dezir i  penso sinseramente es ke, devemos ambezar a bivir kon eyos, achetar ke egzisten. Se alkansa puede ser a una manera de akavido, de prekosyones... Siguro dezir es muy fasil! Ma pratikarlo?…Komo dizimos: “desharemos la shaka!”... En seryozo,  yo syempre pensi ke no devemos minimizar los perikolos. Ansi, se puede gerrear kon eyos, en la mezura del posivle o mos puedemos guadrar un poko. Komo la dicha: “Guadrate ke guadre D..” i no devenir esklavos de muestros espantos.

En realidad keridos amigos, kije kon un poko de umor, ablandar la seryozidad del teksto. Porke, me esto rendyendo kuento ke me echi en una aventura, en eskojyendo esta tema. Ay muncho de eskrivir ma, es un sujeto komplikado i bastante psikolojiko. En fakto syenteremos un profesyonal:  “El espanto es una tempesta sentimental, fuerte, espontanea, ke anvelopa la persona, tambyen fizikamente. Dependyendo de su gravidad, se syente un dezekilibro organik i moral, una panika”.

Reselo o espanto?… Las reaksyones son kaji semejantes. La vida aktual, los eventos estan pujando el stress, manadero de sentimientos negativos, portanto umanos, muy  normal.  Ande eskapa el reselo? Ande empesa el espanto?… Es difisil de apartar uno del otro. Muy frekuente dizimos “ me esto espantando al lugar de esto reselando”. Komo eksplikar la diferensya, la nuans?..

Mos espantamos en jeneral, de una koza, una persona  byen determinados o konretos. En el reselo, saves ke ay una sekana,  ma no lo konoses enteramente. No saves kuando, ke manera, de ande va venir. Este dubyo, es en grande parte, la kavza del dezrepozo moral. Para eksplikar mas bueno, puedemos dar  egzempyos.

En la rash de 1999, MOS ESPANTİMOS. Durante un largo tyempo, estuvimos bivyendo kon este RESELO,  mizmo, si de vez en kuando mos olvidimos. Otro reselo fue el “kapkaç”, un sentimyento destruktivo. Lo estas vyendo en la TV, lo estas sintyendo kada diya i lo estas reselando por tu persona. Yo lo konosi, kuando no se konosiya afilu su  nombre. Dos personas, me alkansaron entrando al asansör. Del espanto, porke era puro espanto, me paralizi, no pude  ni  gritar. Me dyeron en la kavesa, me entontesi. Fuyeron, despues de tomarme la chanta. No me olvidi este pasaje, oy en diya…En entrando sola a un imoble, syempre miro detras,  ver si ay alguno…

Avlaremos un poko de “Fobi” ke, en realidad, no tyene dinguna baza lojika o reel. Todo en savyendo ke no ay alguna razon, la persona mira de fuyir, de evitar la kavza “imajinarya” de su espanto.   Los psikologos afirman ke ez un modo de -nevroza-, prezentando una grande diversidad. Adjustan, ke una fobi sin un efeto negativo sovre la vida de kada diya, no es konsiderada komo hazinura. En kavzo kontraryo, se deve konsultar un espesyalisto.

Keridos lektores, esto vyendo ke este artikolo  no esta muy alegre. Ma, la vida, eya, mos esta embezando syertas kozas. Estos propozitos no deven ser konsiderados komo sinyo de pesimismo, porke no son ansi... Son, simplemente una partida de las realidades de la vida. Eya, por una parte, mos esta firyendo, (no topi otro byervo), de otra parte, mos esta dando alegriyas, esperansas en kompensasyon…

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın