Es ansi en İsrael: Por la liberasyon de un soldado inosente - “el afrankamyento de 1027 kulpantes palestinyanos, entre los kualos munchos tyenen las manos manchadas de sangre djudia”, i esto malgrado el peligro ke esta operasyon reprezenta para un chiko payis entornado de enemigos, i sovre todo malgrado el sentimyento de grande amargura de las madres i los padres ke, en el pasado, pedreron sus ninyos durante asaltos terroristos i ke ansi se topan afektados por la vida en sus dolyo permanente.
Lunes 17 Oktobre 2011 - Despues munchas diskusyones entre el Hamas i el Governo Israelyano, despues tambyen la kuesta dezesperada de una madre i un padre ferridos terrivlemente en sus sentimyentos los mas profundos, la desizyon fue enfin definitivamente tomada de la liberasyon del soldado Gilad Shalit kontra mas de mil prizonaryos palestinyanos.
La Prensa oksidental (kaji en su totalidad) saludo sinseramente este akto de salvasyon. Es el primer akordo entre Israelyanos i Palestinyanos ke sera realizado Martes el 18 del mez koryente, i puede ser el premisyo de una situasyon de “no-belijeransya” malorozamente ainda terrivlemente problematika entre los dos puevlos afektados kada uno en sus sentimyentos nasyonales
En Israel, la alegria es mesklada de amargura; komo dicho mas arriva, entre los enkarselados palestinyanos ke seran liberados se topa munchos ke partisiparon a aktos de terrorizmo ande muryeron mansevos i ninyos İsraelyanos.
Natanyahu embiyo a las famiyas de las dichas viktimas, una lettra dizyendo ke la desizyon de esta operasyon fue para el, la mas difisil i la mas doloroza ke el tuvo a tomar en su egzersizya de shefe governante.
En efekto, la situasyon es realmente ambivalente. Eske el Governo Israelyano puedia tomar una desizyon diferente? Es ke el puedia deshar murir un manseviko inosente ke ainda puede ser salvado?
Una otra kestyon persige el esprito de munchas de las personas kon las kualas tuve la okazyon de avlar a este sujeto: Ke sera no solo el estado fiziko, ma (lo mas importante a esta edad) el estado psishiko de este mansevo ke durante 5 anyos estuvo enserrado en una prizyon enemiga, sin ver una kara amiga ni oir una boz kerrida ?
En ke prizyon del mundo ke sea, la mayoria de los detenidos(tutuklular) tyenen kontaktos kon sus serkanos, tyenen tambyen kontakto los unos kon otros , pueden avlar entre eyos i komunikarsen lo ke resyenten, sus regretos o sus proyektos a venir; mizmo envezes sus arrepentimyento komo al kontraryo sus dezeo de vengansa enverso tal o tal amigo ke los denunsyo.
Gilad Shalit, el, fue enkarselado “inosente” no solo en un espasyo enemigo ma en un espasyo de absoluta soledad, sin pueder komunikar kon ken ke sea, ni partajar su dezespero o su revolta.
Por un largo, muy largo tyempo, el no tuvo komo interlokutor ke el mizmo, su dolor, sus rekordos i sus aspirasyones irrealizadas del tyempo pasado. Ke fue entonses su dialogo de si kon si mizmo? Puedeser un dia en el futuro, el lo komunikara.
El fue kondenado a una vida de rekluzyon a una edad ande el esprito es integralmente tornado verso el futuro , un futuro ke el no tenia entre las kuatro paredes ande fue enserrado....
Por seguro ke el retorno a su payis, a su kaza i a la dulsor de los brasos maternales, lo ayudara muncho, ma asta ke grado? Ser krualmente molestado sin ser kulpante desha munchas vezes yagas ke nada pueden kurar.
Los ravajes de la gerra son inkomparavles a kualkyer otras desgrasyas, el individuo se topa delantre una pared inhumana, sodra a kualkyer implorasyon, una pared de indjustisya ke inevitavlement pusha por un largo tyempos las viktimas verso la revolta kontra la vida eya mizma i mizmo (ainda mas grave, muncho mas grave) ke las pusha verso el dubyo.
PS: Martes 18 Oktobre
El kotidyano elektroniko “Le Monde” mos ambeza ke Gilad Shalit ya fue liberado i se topa en este momento en ayifto ande un ofisyal Israelyano vyendra verifikar su estado de salud antes de ser transferado en teritoryo Israelyano.
