Dos eventos ke no tyenen ninguna korelasyon kon los varyos sujetos realmente sinyifikantes de la semana pasada, me izyeron muncho pensar
El epizodo de Youcef Nadarkhani
El primer, importante en lo ke sera su konkluzyon i trajiko en su “ser” ansi ke en su “potensyal de obskuro fanatizmo”, me pusho a formular de mi para mi kestyones a las kualas no topi ninguna repuesta.
Segun lo ke meldi en el hebdomadaryo Fransez‚ ‘Le Point”, debasho la sinyatura de Michel Colomes, el kavzo es el sigyente: Youcef Nadarkhani de nasyonalidad Iranyana,aedado de 34 anyo, era legalmente Pastor en la Eglisya Evanjelika de una chika sivdad serka de Teheran; ma aktualmente, a la sigida de su refuzo de mandar sus dos ijos a los korsos de Koran, i debasho el preteksto ke el es desendyente de una famiya muzulmana konvertida al kristyanizmo, las otoridades Juridikas del payis lo metyeron delantre la amenaza de ser kondenado a la “forka” si no renyega immedyatamente su fey kristyana, lo ke el refuzo kategorikamente.
Al reziko mizmo de pedrer su vida, el tuvo el koraje de eskojer la muerte afin de no renunsyar a sus konviksyones espirituales. Los prezidentes Obama, Cameron i Sarkozy intervinyeron immedyatamente afin de obtener la anulasyon de la dicha sentensya, la kuala es una violasyon del “Pakto Internasyonal sovre los derechos siviles i politikos” ke fue akseptado en toda libertad de la parte del Iran, komo lo prova su konstitusyon ke garantisa la libertad de relijyon i de Kreensa .
Ke sera la repuesta de los tribunales Iranyanos a la intervensyon de los tres prezidentes?
Es ke sus Kreensas relijyozas eyas mizmas no los pushan a respektar las kreensas i los dogmas de una otra relijyon Monoteista? Es ke sus fey en un Dyo Uniko no los ovliga a sovreguadrar la vida de kualkyer kriansa humana?
Einstein i su immortal glorya
El segundo kavzo, grasyas al Dyo, no tyene el mizmo nivel dramatiko, ma tambyen mos desha pensativles:
La semana pasada, la prensa mos ambezo tambyen ke un grupo de investigadores del “CNRS de Fransya” parvino a provar ke es posivle de ir mas leshos ke la velosidad (hız) de la luz… La novedad en eya mizma es inkontestavlemente de una grande importansa syentifika i va mas leshos ke la formula de Einstein.
Kada deskuvyerta, chika o grande, es un paso muevo ke va mas leshos en el adelantamyente de la konosensya i ansi devyene un enrikesimyento endjendrador el mizmo de un muevo desvelopamyento. Ma, malorozamente en los varyos komentaryos ke oyi a este sujet, una chika remarka me sorprendyo muncho: kon muncha sertitud el autor de un artikolo a este sujeto, disho sin la mas chika hezitasyon, komo si se tratava de un f’akto inkontesrtavle ke “esta deskuvyerta es un destronamyento de Einstein”…
Ke sinyifika la palavra ‘destronar’? Ninguna mueva deskuvyerta destrona o annihila las presedentes. En ke kampo de la sivilizasyon ke sea (syentifiko, literaryo, filozofiko o sosyal) nada puede ni deve kedar estatiko al infinito, todo deve evoluar, i se puede mizmo dezir ke el fakto de kedar sovre un solo punto es mortal.
Einstein kon su teoria sovre la relatividad kedara syempre el mizmo i ansi sera de su grandor. La mueva deskuvyerta si es provada sera tambyen un grande paso adelantre ke glorifikara los nombres de los syentifikos ke la toparon.
Es ansi del progreso komo de la evolusyon de la sivilizasyon, ninguna mueva deskuvyerta no destrona la presedente por la simple razon ke ninguna entidad es fraguada ex nihilo (sovre nada)… todo repoza tambyen sovre esforsos i kreasyones anteryores.
Si una mueva formula fue deskuvyerta, esto es una rikeza para el patrimonyo intelektual de la humanidad ; ma en ningun kavzo un destronamyento de las presedyentes…
La grande favor ke el Dyo akordo al ombre es de ser una kriansa pensante sin tener repuestas prontas en su programa biolojiko, lo ke la pusha kontinualmente a formular kestyones i a ser ovligada de bushkar eya mizma las repuestas … Lo ke aze la sivilizasyon, la real, es djustamente esto, una transmisyon kontinual de konosensyas i ideas ke en desparte de sus valor intrenseka, yevan tambyen en eyas la posibilidad de krear ande otros “muevas ideas”, “muevas aspirasyones” i “muevas inspirasyones”.
