Kippur i su Grandor

Klara PERAHYA Judeo-Espanyol
5 Ekim 2011 Çarşamba

En unos kuantos dias “Kippur”, dia sakro, dia de soledad facha kon facha kon muestra konsyensya, kestyonamyento de mozotros para mozotros i sovre todo arrepentimyento... Si no ay arrepentimyento no puede aver perdonansya.

Kel Todo Piadozo, kon su inmensa klemensya, perdone todas muestras faltas i todos los pekados ke kometimos konsyentemente o inkonsyentemente.

Ke El mos ayude en muestra lucha kontra la tentasyon de ser indjustos, falsos o hipokritos i ke mos de la fuersa de eskojer el kamino de la Verdad mizmo si es yeno de obstakolos i envezes de humilyasyon.

Seamos dinyos de muestra kondisyon de kriansas pensantes, responsables de muestros aktos i muestras echas.

Azeremos el esforso de azer del enemigo un amigo i de ambezar al falso lo ke es la sinseridad i al malo lo ke es la buendad.

Ke la kerensya i la solidaridad gien muestros pasos…