Muestro amigo Jean Carasso, fundador i shefe redaktor de la muy interesante revista “La Lettre Sepharade” ke malorozamente se topo (antes un syerto tyempo) en el ovligo de arrestar su publikasyon por kavza de problemas de salud, vyene de mandarme un e-mail anunsyando ke la integralidad de los numeros fue, sovre desizyon de ‘La association des Amis de la Lettre Sépharade‘, introduzida en el Web debasho el adreso elektroniko: http://www.lalettresepharade.fr/ ke permete de entrar en el sito en kestyon i de releer munchos de los artikolos ke avian sido publikados i partikularmente las tan interesantes analizis de varyas situasyones, echas por el fundador de la gazeta, el mizmo.
Munchos de muestros konsivdadinos frankofones apresyavan partikolarmente esta revista, por su alta kualidad de transmisyon de todo lo ke se pasava (a diferentes epokas) en varyos lugares del mundo Sepharade, i por el alto nivel de sus eskritas aparejadas en mayoria por autores muy byen konosidos
Esto konvensida ke para munchos de entre mozotros, sera un plazer de vijitar el sito en kestyon i de komunikar sus komentaryos i refleksyones.
Del kambyo de ideas nase la verdad i munchas vezes (komo lo avia dicho el grande filozofo Fransez) la luz.
