Laisizmo simbolo de sivilizasyon

Klara PERAHYA Judeo-Espanyol
21 Eylül 2011 Çarşamba

La semana pasada, en Ayifto,  muestro primer Ministro Recep Tayyip Erdoğan afirmo una vez mas lo ke syempre fue  una de la mas grandes karakteristikas del puevlo Turko “el esprito de Laisizmo”...

Bastante aedada, me permeto de testimonyar ke syempre desde mi chikes senti (en tanto ke myembro de una de las minoridades relijyozas de Turkia) la libertad absoluta de praktikar mi kulto i observar el tradisyonal  ritual espiritual de la relijyon a la kuala apartengo.

En su sinyifikasyon la mas profunda, ay en le prinsipyo de laisizmo un  grande humanizmo ansi kel respekto de la libertad de kreensa i de pensamyento de kada individuo ken ke sea, a la kondindisyon (se entyende byen) de respektar si mizmo el orden publiko i no frustrar la sensibilidad de kualkyer  otra persona.

Ay sovre todo en el laisizmo la akseptasyon del ‘otro’ kon su diferensya ansi ke kon su sistema de refleksyon i su sensibilidad relijyoza.