La ekspozision de Eichmann en Yad Vashem

Dora NİYEGO Judeo-Espanyol
21 Aralık 2011 Çarşamba

Konosido komo el architekto del Holokosto, en su rolo de koordinator del jenosido de los nazis, Adolf Eichmann se fuyo a Almanya duspues de la gerra, ma Mossad lo apanyo en Arjantina, i mas duspues fue juzgado en Yerushalaim en el anyo 1961.

El testimonio de mas de sien  sorviventes judios, atiro la atansion del mundo, i amostro al mundo los horores de la Solusion Final de los nazis. El objekto del Holokosto era ‘destruir el puevlo judio de la Evropa’. Munchos de los nazis ke mataron sesh miliones de judios, aplikaron los planes de Eichmann. Eichmann fue el kreador de estos planes.

El juzgo de Eichmann, en mezmo tiempo kito en medio la rezistensia judia, i ayudo a efasar la imaj del judio ‘indo a la muerte sin kitar boz’.

Sukuenta anyos duspues de este evenimiento, los dias ke pasimos, una ekspozisionm amostrando los horrores de Eichmann i de los otros nazis, tomo lugar en Yad Vashem, en Yerushalaim.

En esta ekspozision, ke tiene komo nombre ‘Kon mi aki ay sesh miliones de akuzadores’, aparte de los horrores de Eichmann, puedesh topar piesas ke apartienen a Eichmann: sus entojos, su portofolyo kolorado, su karta de identifikasion debasho de su falso nombre arjantino ‘Ricardo Klement’, pajinas de su livro de memoria ande eskrivio sus memorias kuando estuvo en prizion en İsrael.

En esta ekspozision, se topa tambien fotos de Eichmann en sus momentos los mas dezgrasiados: los ojos atados, debasho la enspeksion de la polisia kuando arivo a İsrael, i kuando estuvo en la prizion kon una sweter enriva i kon charukas.

El juzgo de Eichmann empeso en el 11 de Avril 1961, i kontinuo kuatro mezes. En este enterval, Eichmann estuvo asentado ariento de una kabina de vidro, sintiendo kon kalmedad los testimonios de los sorviventes ke estuvieron kontando sus esfuersos para matarlos.

‘Yo estuve aziendo lo ke me enkomendaron. Yo estuve suivando los planes ke me dieron’ estuvo repetando Eichmann. Ma no puido konvenser a dingunos. A la fin del juzgo, Eichmann fue deklarado kupable de krimes de gerra, i de krimes de umanidad.

El anyo suivante, Eichmann fue enforkado en İsrael. Esta fue la sola vez ke İsrael dio una penalidad de muerte.

Unos rejistros de la boz de Eichmann ke fueron publikados unos kuantos mezes antes, estan dando evidensia ke Eichmann no estuvo ‘aplikando los ordenes ke le dieron’ komo el estuvo repetando en el juzgo. ‘Yo no su bovo ke va suivar ordenes.Yo so uno de los kreadores de las ideas de la Solusion Final’.

En estos rejistros, Eichmann esta tambien ekspresando kon inyervo ke no puidieron matar a todos los judios. ‘No izimos muestro echo komo se deviya. Aviya mas muncho de azer’.