Batya Natan

Felısıdad, Nosyon kon diversos Aspektos

El umano enkontra tantas sufriensas en su vida ke, el solo entre las kriansas, se ovligo a inventar la alegriya i la riza.” Nietszche

Felısıdad, Nosyon kon diversos Aspektos

Meldatesh una dicha ke mos aze un poko pensar. Porke, de diya en diya estamos mas ralamente riendo o azyendo lores. Ke mos esta afitando? Deke esta tan difisil alkansar la felisidad? Penso ke kada uno a su manera la esta bushkando. Los optimistos dizen ke no es tan difisil de toparla. En vezes esta tan serka de mozotros… Portanto, i muy leshos tambien, todo el tyempo ke no se aze esforso para eskabuirmos de muestras ambisyones eksesivas, de muestros selos sin mezura… El Pirke Avot: 4:1 dize. “Riko es el ke se syente orozo kon lo ke tyene”. Egzaktamente komo mi kerida Nona (de b.m) uzava a dezir:”El benadam es tan “ojo vaziyo” ke no se kontenta kon lo ke tyene i va bushkando por los kuatro kampos. Le parese ke las rikezas le va traer felisidad”...

 Me akodro en mi chikes kuando nasyeron mis ermanikos yo diziya: “Ke trezoro, ke felisidad es en la vida tener ermanikos. Partajas kon eyos tu kerensya, tus djugos i afilu tu chokolata!”. Mis amigitas ke teniyan ermanas me aziyan pizmas en adjustando: “Mozotros partajamos tambien i muestras vestimyentas!” Al pareser, akeya edad esto deviya ser muestra konsepsyon de felisidad. En todo kavzo, los anyos no troka muncho. Los ermanos syempre kontinuan a partajar seya las alegriyas, seya las penas, espesyalmente i sus grande kerensya.

En la rutina de la vida de kada diya tenemos uzos, maneras de bivir a kualos no damos  muncha importansa o no azemos muncha atansyon diremos, tanto semos auzados a este ritmo de muestra egzistensya. Muy frekuente, no mos rendemos kuento de la shans ke posedamos. Son los eventos, los akontesimientos o malores ke oyimos o vemos, ke mos azen realizar muestro estado bastante (o relativamente) bueno.

Seya en muestro entorno o seya en un mundo leshano vemos djente  malorozos o en negro estado. Es alora ke entendemos ke muestros problemas no son tan importantes, komparados kon los de estas personas. Tambien, es alora ke devemos azer lores al D. i mizmo bushkar remedyos de ayudar. Ay maneras i maneras de azer esto porke entonses, afilu las distansyas no son impedimientos a todo sorte de ayudo.

Este teksto lo esto eskrivyendo unos, kuantos  diyas despues el sigundo terremoto de Van, sivdad en el Este de muestro pais. Los lektores ke tuvyeron la oportunidad de segir i el primer terremoto seya de la prensa eskrita o seya de la T.V, por siguro ke van a entender lo ke kero dizir. Vimos estas personas diya i noche kavando kon sus manos, entrando aryento de las ruvinas al koste mizmo de sus vidas. Fuimos testigos de sus grande felisidad kada vez ke reusheron a kitar un reskapado bivo. Vimos sus desepsyon, sus pena kuando no pudyeron azer lo mizmo para los infortunados…Vimos ke vinyeron de paises leshanos para salvar vidas i peryeron sus propia vida en el sigundo terremoto…

  Keridos amigos, mi entisyon no es de pintar un tablo oskuro. Solamente  azer akodrar estos byervos del famozo eskrivano fransez Albert Camus ke lo disho mijor ke mi: “Sİ TOPATES LA FELİSİDAD İ LA GUADRAS PARA Tİ SOLO, ES UNA VERGUENSA”… Kere dizir, deves partajarla kon otra djente. Puedesh azer una koza pozitiva komo ayudar a los menos fortunados, un ayudo fiziko, finasyal o simplemente moral, en la mezura del posivle.

Asigun los optimistos, no  es muy difisil de alkansar a la felisidad. Es un punto de vista. Porke  optimismo no kere dizir ver kontinualmente la vida en roz o djugar a “Pollyanna” todos los diyas de la semana. El optimista ve los malores, los problemas. Ma, kon su karakter i su vizyon pozitiva, bushka kaminos de remedyar, kon la esperansa de amijorear.

Kualo puedo mas adjustar? Teneremos un fuerte sentimiento de agradesimiento, de lores a D. Si tenemos razones de azer lores, es ke ya devemos konoser una syerta felisidad.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
550