I sı la esperansa devyene un dia realidad...

De la esperansa puede naser un proyekto. İ del proyekto una mueva realidad

Klara PERAHYA Judeo-Espanyol
7 Aralık 2011 Çarşamba

Vyernes pasado, komo me se izo un uzo, kije echar un ojo en diferentes gazetas del dia, lo ke me lo permete este instrument irremplasavle ke es el ordinador i su Web, maraviyoza posivilidad de saver, mizmo si es superfisyalmente, un poko de lo ke se pasa en el mundo.

Komo kada dia, no tenia ninguna esperansa de topar kualkyer koza pozitiva, syempre los mizmos problemas sin solusyon, el mizmo marazmo ekonomiko, la mizma bushkida de proyektos sin voluntad real de realizasyon, la mizma instabilidad politika i sovre todo el mizmo espanto de deshar despues de mozotros (a muestros ijos, inyetos, i bis-inyentos) un mundo inkoherente.

İ en supito, entre los diferentes editoryales, por la mas parte pesimistos, del semanaryo “Le point”, una eskrita sinyada: Bernard Henri Levy i entitulada: “Israel- Palestine: et si la paix était à portée de main?” (Israel Palestina: i si la paz esta ‘al alkansar de la mano’?)

Malgrado mi septisizmo, senti en mi komo una flamada de esperansa. En su eskrita, el eternal idealisto i aktivisto ke es el filozofo BHL mos konta lo ke se paso durante la ultima reunyon de este anyo, de los protagonistos del famozo “Plan de Geneve” (Plano de Djenevre) formulado ofisyalmente en Suisa, ay de esto 8 anyos, kon el apoyo de altas personalidades Suisas,Palestinyanas, İsraelyanas i estranjeras,  todas de muy alto nivel intelektual i sovre todo moral.

Vos do debasho de estas linyas la traduksyon mas o menos tekstual de unos kuantos pasajes kurtos ma muy sinyifikativos de lo ke eskrivyo de Djenevre mizmo, Bernard Henri Levy:

“.....Es aki, ay de esto 8 anyos, ke ( kon el apoyo de sitizanos Suissos i Fransezes) fueron echados los primeros jalones del “plano de Djenevre” pensado i formulado de la parte de personalidades de las dos sosyedades siviles (la Palestinyana i la Israelyana).

Aktualmente, “la absensya de todo modo de negosyasyones entre los dos payizes” no troko en nada las aspirasyones i ideas de los aktores de la epoka...

Yossi Beilin, uno de los prinsipales partisipantes Israelyanos de esta inisyativa ekspliko una vez mas ke la sola solusyon para eskapar de la espiral de maz a maz rapida del fanatizmo i del odyo, es de akseptar de las dos vandas, el dolorozo sakrifisyo de una partida de sus aspirasyones.

De su parte, en repuesta a la kesha de una estudyante Palestinyana “de aver abandonado el derecho al retorno de los refujyados de 1948 i de sus desendyentes”, Yasser Abed Rabbo, partenaryo palestinyano de Yossi Beilin se eksklamo: “Esta renunsyasyon a un derecho irrealizavle” es la sola manera de evitar i impedir una mueva Nakba, una mueva desgrasya...

En lo ke me konserna (kontinuo BHL)” mi dezeo es no solo de komemorar ma de kontinuar i kontinuar i mizmo engancharmos a kada posibilidad de ayegar a la realizasyon de la ermoza inisyativa del anyo 2003.”

Ansi eskrivyo el filozofo Bernard Henri Levy i mos disho tambyen  munchas otras kozas en el mizmo senso, ke no me atrivo de trasledar,  de espanto de azer un yerro de interpretasyon o de traduksyon...

Ma, ke kere dezir este titolo: et si la paix était à portée de main “(i si la paz esta ‘al alkansar de la mano)? Ainda, malorozamente nada de definitivamente konkreto ni de verdaderamente real...ma se puede pensar ke kuando una esperansa tura i persiste desde mas de 8 anyos, kon la mizma konstansya, eya devyene kaji una real posivilidad.

En todo kavzo, “esta komemorasyon 8 anyos despues la primera sesyon del proyekto de Djenevre” es la afirmasyon tanjible de una dezeo de ermanda, al kual ninguno aksepta de renunsyar.

En kual kampo de aktividad ke sea, munchas grandes realizasyons nasyeron de lo ke paresia ser una utopia o un proyekto en el ayre. Deke no provar i en este kampo? Deke no bushkar muevas posivilidades bazadas esta vez sovre un simple esforso de humanidad del kual puedra naser la amistad i la solidaridad?