La vakansa es un konsepto emportante para pueder fuyir del monotonismo de kadal dia.
La persona tyene menester de repozarse fizikamente i moralamente para pueder kontinuar a rezistir a las difikultades.
Antes dos semanas uvo unas vakansas de dyez dias; ke unos dentre mozotros se fueron a viyajar, otros entraron a la mar i profitaron del kalmo de las islas, otros asistyeron a las aktivitades kulturales komo konsertos, filmos, ekspozisyones i diversos evenementos.
Veramente la vida esta muy difisil para todos.
Los mansevos ke no tyenen oras de lavoro estan penando muy muncho para reushir. Estan lavorando muy tadre fina las medya noches, la fin de semanas i mizmo en las vakansas. Por esta razon tyenen menester de repozarsen para azer esforsos.
La vida esta koryendo komo agua i todos keren profitar i azer munchas kozas en el mizmo tyempo. Ma kuando la edad esta avansando, esta una kanserya grande de pueder abasteser i alkansar a todo modo de akontesimyento. Siguramente ke kale profitar de todas las ermozuras.
Las vakansas dependen de las personas. Para unos es; durmir dos oras mas tadre las demanyanas, para los fonksyonaryos (memur) la vakansa es; la fin de la semana. Para el hazino ke esta en la kama la vakansa es; ke kuando vyenen lus musafires para vijitarlo kitar los materyales de sanedad (sağlık malzemeleri) de su mano, de su kara i del puerpo. El mesaje ke kere dar al den frente es, ke esta bueno.
Para otros la vakansa es; la mar, el sol i la arena. Se visten las pantuflas de mar i se espanden en las shezlonges para kemarsen.
La persona syente el menester de las vakansas para fuyirse de las problemas.
Entre semana, una demanyana el telefon sono, i una de muestras amigas mos bushko para envitarmos alhad demanyana a sus barkas (tekne) para pasar el dia endjuntos. Tener amigos buenos es un privilejyo (ayrıcalık). El amigable es emportante para el umano por pueder divertirse (eğlenmek), por pasar el tyempo kon alegriya, por tomar konsejos i por partajar los sekretos.
Mos risivyeron kon muncha amistad, ya aviya buen karar ke no mos rankontravamos.
Mos fuimos a la İsla Sedef (Sedef Adası), una mar limpya la kolor blu entornada de mil tonalidas de vedre de los arvoles. El kalmo mos repozo de la vida kanseryoza i reboltoneyoza ke tenemos en la sivdad. Entrimos a la mar entre los delfines (yunus balığı) ke estavan saltando en la mar, despues de nadar buen karar mos asentimos a la meza para komer.
La meza byen aranjada kon el mantel, ornada de todo modo de ordovres, avlando, komyendo i riyendo el tyempo mos paso muy presto.
Un dia muy reushido kon diferentes anekdotes ke mos izyeron riyir.
La persona no es konkriada (yaratılmış) para bivir solo. La natura propozo la unyon, i por esta razon kale avenirse (uyuşmak) kon los del entorno i divinir amigos. La amistad (dostluk) tura kon el adjuntamyento (birliktelik), i se envedrese kon la kerensya, i da fruta kon el esforso (çaba).
La amistad se realiza entre las personas buenas i vertuozas (erdemli).
La armonia kon la natura, la armonia kon las personas aseguran la armonia kon el mundo.
Fue un dia muy reushido.
Syempre teneremos amigos en muestro entorno, para pueder bivir kon felisitad (mutluluk).
