Mundo estranyo, multiple i mizmo desemejante en su “ser’’. Mundo de opulensya komo tambyen mundo de dezolasyon. Tyerra mantenedera i igualmente (munchas vezes) tyerra kruela en su sekedad. Amistad, amor, kerensya i en mizmo tyempo: rankor, odyo i aborresimyento
Dias pretos en este empesijo del autonyo… dias de enemistad, de reselo i de destruksyon.
En ke lugar del mundo ke sea, la anksyedad devino (kon o sin razon) un elemento kaji permanente de la egzistensya, komo si “un eternal sospecho endjendraror de espanto” se instalo en el korason del ombre.
Mas de un ninyo sovre tres muere kada dia en la Afrika devastada por la mizerya i los permanentes konfliktos etnikos. Punktual en su funksyon de eksterminasyon, la ambrera kumple su misyon makabra. Pechos sekos de madres en el dezespero de no pueder azer nada para salvar de la muerte el fruto ke durante mueve mezes eya yevo en sus entranyas …. ijikos i ijikas ke yoran, padres ke entran la noche a sus kazas las manos vazias
Vidas sin esperansa komo solombras fujitivas sovre una tyerra asekada no solo por el sol sin piadad ma tambyen por falta de verdadero esforso.
De otra parte, Vyernes la noche en Ayifto, malgrado la intervensyon de las Huersas del Orden del payis: asalto de la parte de la manseves Ejipsyana kontra la embashada Israelyana…la pared de seguridad a mitad destruida …de muevo el aborresimyento, el menospresyo i el refuzo del otro…
Alhad pasado, en una grande partida del mundo, fue “la emosyon” i tambyen, la tristeza i la inkyetud… El peligro esta syempre en su lugar, invizivle ma prezente, eskondido en la oskuridad de una deskerensya kaji mundyal.
Alhad el onze Septembre 2011 no solo la Amerika ma la Sivilizasyon entera, en su immensa diversidad, komemoro las tres mil viktimas de la barbaria humana del 11 Septembre 2001.
Padres i madres yoraron sovre las plakas komemorativas de sus ijos, ninyos de sus djenitores, mujeres de sus kompanyero de vida İ komo syempre: “una kestyon” (kaji syempre la mizma) mos vyene kontinualmente al tino… “Komo puede ser ke kriansas humanas kon sehel i konsensya agan semejante akto? Kualo es en realidad el ombre?
Munchos savyos dizen‚’ke semos echos de todo lo ke muestros djenitores mos transmetyeron biolojikamente, i tambyen inkontestavlemente de todo lo ke vemos i oyimos en muestro entorno, de todo lo ke meldamos i mos ambezamos...” por seguro, la influensa de estos elementos es grande, ma en desparte de esto, es ke no ay muestro propyo razonamyento, muestra propya konsensya?
Se avla del “shoke de sivilizasyones“, algunas personas akseptan las tezis de “ Huntington“ ke eskrivyo un livro a este sujeto, otras las refutan. No tengo la kompetensya nesesarya para intervenir en una semejante kontroversya, ma lojikamente, en el kavzo de la destruisyon de las dos torres una manyana de fin de enverano, no se puede tratar simplemente de un shoke de dos differentes sivilizasyones … kuala ke sea, de ande ke sea, del Este o del Oeste, ninguna sivilizasyon puede tener komo motivo de baza ’’la muerte del otro…“
El peligro se topa en otro lugar: puede ser en el fanatizmo, en el ekseso de fokalizasyon sovre un solo tema, el refuzo absoluto de tomar en konsiderasyon lo ke los otros syenten o dizen…
Komo ya lo tengo dicho en el pasado, en otras sirkunstansyas, a mi pareser, el peligro se topa en la devosyon por kualkyer kriteryo, sin achetar el fakto ke otros pueden pensar de una manera diferente.
