Claude Lanzmann en su lucha insesante kontra el olvido

Klara PERAHYA Judeo-Espanyol
7 Eylül 2011 Çarşamba

Claude Lanzmann protesto kon violensa kontra un trokamyento, en kualkyer livro eskolaryo fransez, del nombre ke fue dado a la eksterminasyon de 6 milyones de djudyos durante la guerra 1939-1945, desgrasya inkomparavle a ninguna otra, ke aktualmente kaji todos, de un komun akordo, yamamos Shoa

Segun lo ke el se ambezo, la denominasyon “Shoa” sera trokada en los manuales fransezes de Historya i remplasada por “aneantissement des juifs et des tsiganes” (anihilasyon de djudyos I zinganos) lo ke por seguro no tyene el mizmo koefisyente de sinyifikasyon ke la palavra “Shoah”, la kuala sinyifika en hebreo: “kataklizmo”, “katastrofa”, “akontesimyento desgrasyado indefinisable en su razon de ser”.

Las otoritades Fransezas en karga de los programas eskolaryos desmenten la koza i afirman ke la palavra SHOAH no fue eliminada ni remplasada por ningun otro termo en los tekstos de estudyo.

Se puede pensar ke uvo un malentendido o un yerro de komunikasyon, puede ser mizmo una falta de interpretasyon. Los dias lo mostraran.

Munchas personas konsideran este kudyo partikolar de Claude Lanzmann komo eksesivo i mizmo egzajerado… por seguro, kada uno es libre de pensar segun su propya lojika i sovre todo segun el grado de su propya proksimidad kon el sujet.

Esto dicho, de otra parte, mos ambezamos de mezmo, ke fue introduzido en differentes kapitolos de los mizmos livros eskolaryos fransezes, la palavra araba “Naqba” ke sinyifika eya tambyen “katastrofa”, para ekspresar la prezumida desgrasya ke reprezenta para los palestinyanos “la kreasyon del Estado de İsrael”, konsiderada komo el ekivalente del jenosidyo de 6 milyones de muestros ermanos.

Komo lo savemos todos i lo afirman munchos komentadores i analistos de diferentes payizes oksidentales, no ay ningun punto komun entre “Shoah” i “Naqba” malgrado la similitud de apelasyon, la una en Ebreo, la otra en Arabo…

Tal ke lo dize el Profesor Guy Milliere, ensenyante en la Universidad ‘’Paris VIII’’, İsrael fue kreado en 1948 sovre tyerras konsideradas komo no apartenyendo a ninguna nasyon despues la okupasyon Otomana i İngleza, El fue kreado i instalado segun la voluntad de la Asemblea Jeneral de las Nasyones Unidas , kon la aprobasyon de la grande mayoria de los payizes aderentes; ma immedyatamente despues su promulgasyon, el fue atakado por la totalidad de las fuersas arabas del deredor

Una kestyon espunta inevitavlemente en muestro esprito: “Komo seran konsiderados estos dos akontesimyentos en uno o dos sigloss?”

El ser humano es olvidozo, i es por el byen de “la humanidad en su totalidad i por asegurar su dinyidad” ke estos dos epizodyos deven ser prezentados no segun la sinyifikasyon de las denominasyones ke les fueron atribuidas, ma en sus real otentisidad.

Oy mizmo, en desparte del terrivle negasyonizmo ke munchos arabos i pro palestinyanos ekspresan, ay en algunos grupos sosyales oksidentales, komo un djenero sino de indiferensya ma de dezenteres de la historya tal ke eya se paso en realidad. Ansi, es a mozotros djudyos ke tuvimos la doloroza oportunidad de ser de leshos los testigos de esta verdadera desgrasya, sin ser direktamente feridos en muestra propya karne, ke kaye el dover de no deshar su rekordo undirse en el olvido.

 Sin nyegar ni en ningun kavzo minimizar la importansa de los otros masakros humanos perpetrados en diferentes lugares del mundo (munchas vezes en el eskopo de konkuistar un pedaso de tyerra, o de dominar un puevlo vezino, eventos ande mueren ninyos i adultos sin kulpa ni pekado) ninguno de entre eyos iguala la horror de la Shoah.

 La Shoah no fue la konsekuensa de un akto de ravya o de vengansa, ni tambyen de embidya o de esprito de konkuesta, la Shoah fue el akto de “una voluntad absurda de kerer destruir un puevlo entero, konsiderado komo de rasa inferyor”.

La Shoah fue un akto planifikado sin motivo admisivle, de sangre fria, en el kalmo de reunyones entre partenaryos de un mizmo klan, puede ser mizmo entre dos rizas o dos vazos de bevyenda…Eya fue el rezultado de un proyeto kriminal aparejado en una kompleta lusididad de esprito.

Es la razon por lakuala , el rekordo de la horror de su elaborasyon sistematika i de la minusia de su programasyon, devra kedar syempre en la memorya de la humanidad, komo un immenso punto de interrogasyon, uniko en su abominasyon, afin ke mas nunka, en ningun lugar ni en ninguna epoka en el futuro, esto se repete.