De muevo la muerte, de muevo lagrimas i dolyo. Kuala sea la parte de la frontyera ande la koza se paso, lo ke importa es todas estas madres ke oy yoran sus ijos, estos guerfanos ke se engrandeseran sin padre, estas bivdas aisladas ke bushkaran la kayentor de los brasos del ombre ke aman... Si, lo ke importa es todas estas vidas kortadas bruskamente del mundo terrestre, antes de kumplir la misyon sublime ke mos demandan los syelos:” bivir i azer bivir, gozar i azer gozar, lavorar, lograr, dar i transmeter”.
Deke eskojer la muerte i la sufriensa? Ninguna kreensa, ningun ideal, sea el mas sublime, tyene el derecho de egzijir la fin de una vida.
En semejantes kavzos se produze una presipitasyon de los eventos, el primer kreando la nesesidad imperyoza de una repuesta, la kuala fatalmente es paridera de una kontra riposta i ansi suksesivamente, asta formar una espiral vertijinoza engrandesyendose de mas a mas...
La gazeta elektronika “Jerusalem Post en français” mos dyo ora por ora el tablo de los tristes akontesimyentos de djuevez pasado:
“Ora -12: Tres terroristos armados de fuziles i bombas artizanales ke se infiltraron a partir del Ayifto avrieron huego sovre un otobus İsraelyano entre Eilat i Mitzpe Ramon, 10 pasajeros fueron feridos.:
12.20: Uno de lo los terroristos avrio huego sovre un otobus i izo eksplozar su vita kargada de eksplozives; el konduktor Israelyano i el terroristo muryeron
12.25: Uno de los dos terroristos ainda en vida asalto entonses un otomobil ande se topava 4 personas de retorno de vakansas, i las mato todas, despues de kualo travo sovre una otra jeep matando el konduktor i una mujer. Entonses ayego una jeep de la brigada Israelyana Golani ke parvino a matar el segundo terroristo , ma el treser, el, travo sovre los soldados Israelyanos matando uno de entre eyos: el serjente Moshe Naftali
12h30-13h00: Los soldados i los myembros de la Unidad antiterrorista Israelyana YAMAM lokalizaron el treser terroristo ke parvenyeron a eliminar por syempre..
13h30-14h30: Dos otros terroristos avyeron huego sovre trupas Israelyanas desde el interyor del territoryo ejipsyano, a los kualos los soldados de Israel respondyeron.
Ora -15.00: El Ministro de la Defensa Ehoud Barak indiko ke los asaltantes vyenen de Gaza i ke la Armada Israelyana respondera kon fuersa i de manera desiziva.
18.30: Bazandose sovre las informasyones del “Shin Bet”, la aviasyon Israelyana travo sovre la Banda de Gaza, Sej Palestinyanos muryeron, entre los kualos el shefe del komite de rezistensya popular ansi ke otros myembros importantes del movimyento.
Ora 19: De muevo, tiros en direksyon de soldados a la frontyera, probablemente a partir del Ayifto. Un soldado Israelyano fue seryozamente ferido i evakuado al hospital de Beersheva.
Ora 21: El sistema Dome de Fyerro intersepto una roketa Katiousha travada en direksyon de Ashkelon.
Los dias sigyentes tiros de misiles travados a partir de Gaza kavzaron la muerte de uno o dos moradores del Sud de Israel ...
Por kontra 5 soldados Ejipsyanos fueron matados involuntaryamente por las fuersas Israelyanas, por los kualos el Ministro de la Defensa ekspreso sus regretos...”
Ke sera la fin de esta konfrontasyon?
Es muy difisil de luchar kontra personas kondisyonadas a matar, al peligro de sus propya vida... personas ke pedrieron el instinkto de konservasyon, personas ke no dezean nada ahuera de kumplir el objetivo makabro ke los kapos del movimyento enklavaron en sus vizyon de la vida.
Nada puede arrestarlos, ni el remorso, ni el espanto, ni la piadad enverso los otros komo tambyen enverso eyos mizmos... La ensenyansa de la vertud de la muerte konsiderada komo sakra en sus kombate aze de eyos “otomatos ke nada puede arrestar” sino sus propya muerte... Komo luchar kontra esto?
Lunes: el diaryo elektroniko “Jerusalem post en français” mos ambeza esta vez ke a la segida de una larga sesyon del Governo Israelyano durante la noche entre alhad i lunes, a las ora 3 de la manyana, la desizyon fue tomada de no azer ninguna aksyon punitiva de grande dimensyon sovre el territoryo de Gaza, afin de no kavzar una intensifikasyon del konflito kon el Hamas.
De otra parte,(segun la prensa franseza) despues kuatro dias de roketas palestinyanas i de inkursyones aeryanas Israelyanas en Gaza, Israel i el Hamas se metyeron de akordo provizoryamente de kortar resiprokamente el huego.
