La oskuridad parese espesearse kada dia mas en kada lugar de un mundo giado por el egoismo i la violensa.
Mundo sin vizyon humanitarya. Los governos son sometidos en sus desizyones, a nesesidades imperativas ke se kontradizen munchas vezes; de una part: la voluntad de potensya de mas a mas grande de la klasa poderoza enganchada a sus sentimyentos de supremasia, de otra vanda: el puevlo konsyente de sus derechos i ansi intransijente en sus reklamasyones.
Un poko en kada kanton del vasto universo, la rankor, la ira i la sanya… el progreso mos auzo a nunka kontentarmos de lo ke tenemos, el riko luchando para no pedrer su rikeza, el eznafiko espiritualmente ambyerto de alkansar a un nivel mas alto i de afirmar a su torno su voluntad.
Pokos pensan afirmarsen kon sus valor personal i sus potensyal de humanizmo, kon aktos i palavras de fraternidad.
A este propozito meldi por la segunda o tresera vez en uno de los ultimos numeros de la revista Djudia ‘Information Juive’ una eskrita del eskritor Ruso “Leon Tokstoi” konsernando el Djudaizmo…
Fue para mi komo un maraviyozo soplo de esperansa, ademas aktualmente ande Israel entornado de odyo i rankor se topa aislado en la chika superfisia de tyerra ke le fue akordada.
Es la razon por lakuala, sintyendo el dezeo imperyozo de partajar mi plazer kon los lektores del Şalom, pensi adaptar i traduzir este teksto en djudeo Espanyol:
El titolo es: Kualo es un djudyo? (Qu’est-ce qu’un juif?)
“Kualo es un djudyo? un djudyo ke no aboko la kavesa delantre la tentasyon de una egzistensya fasil i mundana ofresida por sus persekutores para ke nyege i abandone su relijyon, i ke no aksepto al peligro de su vida de renunsyar a la fey de sus avuelos?
-El es una kriansa bendicha ke se enrikesyo por syempre de una huego eternal ke aklara la tyerra i los ke biven sovre eya.
Un djudyo es un pionero de la kultura. Desde los tyempos immemoriales, la inyoransa era una koza imposivle en Tyerra Santa, tal ke lo es aktualmente en la Evropa sivilizada…
En los dias mizmo ande la vida de una persona no valia nada, Rabbi Akiva se pronunsyo kontra la kondenasyon a muerte.
Un djudyo es un pionero de la liberta. Kuando en el leshano, muy leshano pasado, la nasyon fue divizada en dos ‘los dominantes’ i ‘los esklavos’, Moise promulgo la interdiksyon de ‘detener una persona komo esklava’ mas de 6 anyos.
Un djudyo es un simbolo de toleransa sivil i relijyoza, la Biblia dize: ‘Mostra vuestro amor al ajeno, porke fuitesh estranjeros en el payis de Ayifto’. Estas palavras fueron pronunsyadas en los leshanos i barbaros tyempos ande era akesptado por todas las nasyones de someter los otros a sus propya voluntad.
La relijyon Djudia nunka se esforso de rekojer muevos adherentes. Al kontraryo, el Talmude dize ke mizmo si no son djudyos, los Djustos de kualkyer nasyon o relijyon meresen el Reynado Selesto.
Un djudyo es un simbolo de Eternidad. El es el desendyente de una nasyon ke ninguna tortura pudo exterminar, ke ni la espada ni el huego de kualkyer potensya pudo eliminar de la superfisia de la tyerra, la nansyon ke la primera anunsyo la Palavra de Dyo, prezervo syempre la profesia i la transmetyo al resto de la humanidad.
Un Djudyo es eternal,el es una inkarnasyon de la Eternidad”
Ansi avlo Leon Tolstoy, ansi avlo uno de los mas grandes eskritores i humanistos de todos los tyempos.
