Batya Natan

Devarim

 

Ansi enpesa La peraşa “Devarim...” Ke es el enpesijo de el sinken livro de la Tora. Estas son las palavras ke avlo Moşe a el puevlo de İsrael. Son palavra de kastigeryo. Moşe Rabenu en sus diyas de alkavo, kastigo a el puevlo cudyo, en la yanura de el Yarden. El les izo akodrar lo yerros ke izyeron entervalo de kuarenta anyos en el dizyerto. Los diyas ke vinyeron kontra el kriyador ke dişeron, mijor era de murir en Mistrayim, ke de vinir a este dizyerto, ke sirvyeron en idolo de Peor, ke dişeron a Moşe Rabenu no ay simiteryos en Misrayim ke nos truşites por murir en el dizyerto.

 Voz keşateş por la magna ke vos dyo el Kriyador, por mantenervos izites el bezero de oro. Les aze akodrar Moşe Rabenu el yerro ke izyeron los eskulkadores de avlar mal por la tyera prometida Moşe Rabenu todos estos kastigeryos las izo a el puevlo cudyo sekretamente. No los kijo azer averguensarlos, de la estima ke teniya verso el puevlo cudyo. Ma despues vemos ke Moşe Rabenu klaramente les aze akodrar los yerros ke izyeron el puevlo entervalo de los kuarente anyos ke estuvyeron en el dizyerto. Dizen nuestros savyos la persona ke aksepta i deşa a su pekado, este pekado se le aze merito. Moşe Rabenu ke konosiya muy bien a su puevlo, ya entendyo, ke el puevlo akseptaron sus yerros dunke no aviya ningun danyo de akodrarselos klaramente ke todos los yerros se izyeron meritos. Moşe Rabenu ekspliko la Tora entera a el puevlo cudyo malgrado ke ya avian sintido en el monte Sinay. Moşe Rabenu, tuvo de menester de repetarla a los ke nasyeron en el dizyerto, a la jenerasyon nueva. La jenerasyon nueva no aviyan sintido en el monte de Sinay, de boka de el Kriyador, si no ke eyos sintyeron todos estos evenementos de boka de sus jenitores.

Malgrado, ke la jenerasyon nueva teniya una grande fey i kreyensa, Moşe Rabenu tuvo el menester de explikarles el mismo.

Moşe Rabenu dişo a el puevlo cudyo: El Kriyador enkomendo i dişo, basta agora ke estuviteş lado el Monde de Sinay. Ya afirmateş munças enkomendansas, ya resiviteş la Tora. Ya fraguateş el Tabernaklo, ya formateş el Sanedrin el Tribunal. Agora kamina a delantre. Agora vos se esta avriyendo el Kamino de la tyera prometida.

Moşe Rabenu eskojo i tomo el biervo Devarim por el enpesijo de la peraşa. Mismo biervo Devarim la sinyifikasyon es bizbas, komo las bizbas nos dan miel ke es dulse. İ la Tora nos adulsa a nozotros, i es vidas para nozotros, komo es diço “arvol de viola es la ley le sostyenen, i todos ke sostyenen a la ley son orozos.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
1314